كيفية المذاكرة قبل الامتحان بأسبوعين

في المقالة دي هنشرح كيفية المذاكرة قبل الامتحان بأسبوعين وازاي نقدر نلم المنهج ونقدر نعدي من السنه من غير اي خساير.

بص يا كبير..
بدايةً كده لو إنت دحيح وشبح وتنين شقلب البوست ده وروح اهري ف أي بوست تاني لأنه مش هينفعك..
ده للغلابه يابا.
أما لو كُنت من عشيرة الغلابه فتعالى لأهلك وعشيرتك علشان نشوف هنتنيل نعمل إيه؟

كيفية المذاكرة قبل الامتحان بأسبوعين

أول حاجه في كيفية المذاكرة قبل الامتحان بأسبوعين

بطل تقول “آه يا حوستى السوده يانا ياما” أو أي كلمات سلبية كل لما تفتح كتاب.
ده ف حد ذاته هيخليك تكره المادة واللي عملها والشراب اللي إنت لابسه .. معرفش إيه دخله بس مش مهم.

تانى حاجه

حط ف دماغك إنك ذكى.. أيوه متستغربش إنت ذكى..
غالباً 80% من الناس الفاشلين فى المذاكرة بيبقوا أذكيه وده يرجع لسببين..
الأول إن إنت بتشوف إن من السهل تلم الحاجات التافهة اللى الدكتور بيقولها..
أما بقا التانى هو إن المنهج قذر جداً وبيدولك المعلومات تخلى أى تنين يتسد نفسه عن الدنيا..
اقتنعت إنك ذكى صح؟ متحطش رجل ع رجل قدامى لو سمحت.
ما علينا..

الحاجه التالته

قول يا واد تعالى نفتح الماده دى نشوفها بتتكلم عن إيه..
اقرى العناوين الكبيره بس متقراش حاجه غيرها.
ومتركزش بالله عليك ف العنوان كتير علشان هتتلغبط اقرا الكلمات زيها زى العنواين الكبيره بتاعة الصفحه الأولى للجرنال اللى انت أصلا مش هتفتح أمه بس عرفت بيتكلم عن إيه من وشه بس..

خلصت قرايه؟.. نام بقى..
لا لا غيرت رأيي استنى..
عايزك تقعد كده وتقفل الكتاب، وتظرف عينيك ف السقف وتقول لنفسك فهمت ايه؟..
بص بصراحه انت مش هتفهم حاجه بس ايزى ده طبيعى جدا لأنك بالفعل معرفتش حاجه بس بقى عندك كام استنتاج كده عن كل قطعة تحت العنوان الكبير بتتكلم عن ايه؟..
الكلام ده لو اتفنطت هياخد منك ساعه الا تلت وانت مش ثابت ع الكتاب يعنى كل شويه تتدلع وتقوم وكده..

رابع حاجه في كيفية المذاكرة قبل الامتحان بأسبوعين

هات بقا الكتاب الجميل وكوباية الناسكفيه بتاعتك الأجمل وتعالى..
إقرأ الهرى اللى تحته وشغل الStop Watch جنبك وإبدأ..
فاكر لما كنت بتقرأ رواية أرض زيكولا؟..
سيبك من الحته بتاعة أسيل لما قالتله قبلنى علشان عيب إرجع لورا شويه..
شوفت إنت كنت بتقرا بتركيز إزاى؟ يمكن إنت مش حاسس بس انت ” حااابب” تقراها.

اوعى تتعامل مع الكتاب اللى قدامك ع انه ماده هتمتحن فيها بكره.
صدقنى لو مقدرتش تتغلب ع دى فياريت متكملش قراية المقالة ولا حتى تفتح الكتاب وروح الجامع اعتكف هناك وافضل إدعى ربنا إن عربيه تاكل الدكتور أو الجامعه تولع علشان متمتحنش..

لازم تجبر عقلك انه يستمتع، ايه المعلومات اللى بتقراها دى، هتستفاد منها ايه لما تقراها.
وبكده 70% من تركيزك هيبقى معاك والله انا جربت كده وكده لاقتنى بعد 5 دقايق عينيا عمال تقرأ كلام وبس ومش مركز خالص طول منا مش حابب اللى فاتحه ده..
هل لو قولتلك أرض زيكولا بتتكلم عن ايه هتقدر تشرحلى؟
حلو اوى أكيد هتقدر لأنك حاببها وقريتها بتركيز والدنيا معاك تمام التمام.

خامس حاجه

عايزك بقا بعد لما تقرا كل chapter أو صفحه ع حسب اللى تقدر تستوعبه فى ال 30 دقيقه اللى انت شغلتهم بالظبط ع الstop watch.
وقوم نادى حد ف البيت أو صاحبك ع حسب المكان اللى بتذاكر فيه.
لو مفيش أنا عن نفسى بجيب الكرسى وأحط عليه الدبدوب وأفضل أشرحله الماده، غير ان أحسن طريقه للتعلم هى إنك تعلم اللى بتتعلمه.

لو مقفله معاك خالص اتصل ع واحد صاحبك تافه وفاضى وبيحب يسمعك.
وقوله تعرف (مثلاً) إن أكتر وقت إنسان فضل صاحى فيه من غير نوم هو 11 يوم وبعدها مات لأن خلايا عقله تلفت ومبتتجددش فأدى الى الغباء وبعدها الجنون وبعدها الموت!!.

وبعدين ياسيدى كل حاجه بتقراها اعمل لها إرتباط تافه، أنا مثلاً ف 3ث كنت بسمى صحابى بأسماء المركبات اللى ف الكيميا العضويه الطويله.
وكل لما أقابل واحد أقول ده ثانى كرومات البوتاسيوم وهكذا.. مش هتنسى أبدا..
وكل لما يبقى فيه أسخف من كده مش هتنسى المعلومه..
خلى المعلومه شبييه بشتيمه حتى مش مهم بس مش هتنساها خااااااااالص، على حسب كلام كتاب الدليل العلمي للتحكم في الذاكرة يعني ده مش أي كلام وخلاص.

سادس حاجه

الكلام اللى المفروض يتحفظ ومش عارف كل شويه تنساه، هات القصاصات بتاعة المكتب.
وإكتب عليا البتاعه الطويله اوى دى وبعدين حطها ف جمله عبيطه او خد كل حرف أول منها وركبهم ع بعض ويطلعلك كلمه تضحك او حتى غريبه واحفظها بيه.

فاكر الزوايا بتاعة جا و جتا وظا والحاجات بتاعة الهندسه دى.
كانوا ف الربع الأول كله موجب التانى جا بس موجبه
المهم علشان الناس تحفظها بقيت تقول “كل جبار ظالم جته داهيه”
كل : ف الربع الأول الكل موجب
جبار: جا ف التانى موجبه
ظالم : ظا ف التالت
جته: جتا ف الرابع
فاهمنى؟

سابع حاجه

طيب تمام، خلصت بقا انت 3 صفحات ف اول نص ساعه وانت بتقول يااااااه ال30 دقيقه شويه أوى
لا هما مش شويه خالص بس انت عملتهم ومينفعش تغيرهم.
لأن غلط إنك تقعد 6 ساعات او حتى ساعتين متواصلين ع كتاب تركيزك بيقل وبتضيع وقت من غير ما تحصل حاجه.

والأهم من كده إن الموضوع ده هيخليك تاخد بالك من الوقت كويس اوى اوى اوى لأنك هتحس كده بكل دقيقه وهتحاول تنشط عقلك أكتر وتنجز فهيبقى ده أحسن..
وكل نص ساعه هتقعد بعدها 10 دقايق بالظبط
5 دقايق break روق ع نفسك بص من الشباك شويه روح إلطش أخوك بالقلم واجرى أى حاجه يعنى بس متفتحش فيس علشان ال5 هيبقوا 500 أنا عارفك..كلامى وااااضح وصرييييييييح 5 بس..ها..5 بس.

ال5 الباقيين بقا هتقولى فيهم انت كنت بتعمل ايه؟
ايوه بالظبط كده انت كنت بتعمل ايه ف نص ساعه..
هتقول ذاكرت مثلاً أدب هقولك طيب ممكن تقولى ايه اللى كان بيتكلم عنه الشويه اللى قريتهم دول؟
اتكلم بصوت عالى حتى لو مش معاك حد وابدأ اشرح والله الموضوع ده كان بيتكلم عن كذا وكذا وكذا..
انسى بقا انك تنسى اللى ذاكرته ده..

فاكر القصاصات اللى عملتها عن الحاجات اللى بتقفل ع دماغك دى ولو وقفت ع شعر راسك مبتحفظهاش..كتبتها؟ امسك بقا كل ورقه منهم وبص فيها..
اقراها بعدين إشتمها..عادى عادى مش هتزعل منك..

بعدين هات لزق صغنن أو اى شكل تلزقهم بيه وحطهم ف اكتر مكان بتتواجد فيه..سريرك..الحمام..المكتب..
المهم يبقى مكان انت دايما موجود فيه وكمان يكون واضح علشان كل لما تتحرك غصب عنك تقراهم..
وانت مش هتنساهم خالص..

ليه بقي

بالعكس انت هتفتكرهم أكتر من اللى ذاكرته كويس بس عايز بس تحرق 3 ثوانى من كسلك..
ف كل مره تقراهم فيها غمض عينك وقولهم لوحدك ولو هتدخل المكان ده وافتكرت قبل لما تدخل اقف وقول انا كنت كاتب ايه..
هتنسى حاجات وتفتكر حاجات بس لما عقلك ينسى حاجه لوحده بيبدأ يركز اوووووووووى لما يبقى عايز يعرفها تانى ولما يعرفها ميرضاش ينسااها..

أنا حافظ الشعر ده..
” وسارَ بأنحاءِ العَقِيشِ مُقَرْنِصًا وهَامَ بِكُلّ القَارِطَاتِ بِشَنْكَلِ.. يقول وما بال البحاط مقرطما ويسعى دوما بين هك وهنكل..”

علشان مطولش عليك أنا قريته كذا مره وهو طويل ع فكره بعدين احاول أقوله لوحدى بصوت عالى زى ما يكون أنا اللى كاتبه.
وبقوله لحد فبغلط ولما أفتح الورقه أشوفه تانى بحفظ الحته اللى غلطت فيها ومبنساهاش
الحاجه الأخيره بقا ف الحفظ طول مانتا عمال تتحرك بلا هدف او فاتح فيس هتضيع وقت.
الحاجات اللى انت مش فاكرها وهى مثلاً مقوله طويله إعمل ريكورد وشغله وخليه يتكرر وانت قاعد فاضى وهتلاقيه ثبت ف عقلك مع التكرار الممل..

امال احنا بنحفظ الأغانى والأناشيد ازاى؟
هى علشان بنسمعها كذا مره لحد لما نزهق وكمان حااااااابين نسمعها وكمان بنحاول نقولها ونغلط فنسمعها تانى فبنركز بقا أكتر فيها..
بص بقا إنت إن شاء الله هتخلص كل الهرى ده بتاع الماده الواحده ف يوم..بس بجد حاول متوقعش حاجه من اللى قولتها فوق دى..

فى النهايه

بقا لما تخلص الماده هتعمل حاجه صغننه بس..
اعمل تلخيص للماده خفيف خالص بيسموه خريطه ذهنيه ويكون شامل للماده واقراه كل لما تبقى عايز تراجعها غير إنك كمان تشد خط فسفورى ع الحاجات المهمه ف الكتاب وإنت بتقرا زى التعريفات او المقارانات علشان لو فتحته تانى هما دول بس اللى هتقراهم
كمان بقا فيه لعبه حلوه أنا بعملها مع أصحابى..
بجيب قصاصات ( ورق صغنن ) وأكتب ع جنب سؤال معين والناحيه التانيه الإجابه وأعمل منه كذا واحده ع الحاجات اللى ذاكرتها وإديه لواحد صاحبى وهو يفرد الورق ناحيتى السؤال وناحيته الإجابه زى الكوتشينه كده وأنا أختار ورقه فيرفعها وأقرأ السؤال وأقوله وهو يشوف الاجابه عنده بقول صح ولا لأ..
ووبعدين أشوف ف الأخر ايه اللى عرفت أقوله وايه اللى لأ وأخد اللى معرفتش ده أذاكره تانى وأحطه مع الدور الجديد
بس كده أنا خلصت ودى كانت طريقتى ف لم المنهج.. يارب أكون فيدتكم بأى بتنجان.

بواسطة: Abdallah salem

اقرأ ايضاً:

كيف يمكنك المذاكرة قبل الامتحان بيومين فقط