طريق الشهرة من خلال الكتابه مع سماح هاشم

في المقالة دي هنتكلم عن الكاتب بيحول يوصل إلي طريق الشهرة وازاي لما بيكتب إنشالله سطرين بيتعشم في نفسه إنهم يوصلوا لكل الناس.
وصوته يسمّع في كل حتة
ويبقى بين يوم وليلة أشهر كاتب وأفظع ترند
زي ما بيحصل مع ناس ملهاش موهبة أصلا وبتتشهر..

وبالتالي الكتاب معظمهم إن لم يكن كلهم بيحسوا بحاجتهم للشهرة
عشان صوتهم يتسمع فيقدروا يوصلوا كلامهم للناس بمنتهى السهولة..
طب حل العشم ده إيه؟!

مالوش إلا حلين،
يا تسعى عشان تحققه بأي شكله وتوصل للرضا اللي نفسك فيه،
يا إما تبطل تسعى الي طريق الشهرة وتكتب لنفسك ومن أجل هدف الكتابة نفسه!

الموضوع ده صعب شوية
لإن الكتابة في الأصل إنت بتخرج حاجات جواك
بعزم ما فيك وتقوم قافل الفايل أو الأجندة ونايم!
كسبنا إيه كده؟!

احنا بنكتب عشان حد يقرا
صحابنا بقى أو حتى شخص معين
أو حتى نقراه احنا بعد سنين طويلة..
المهم إن مادام قلمك جهز وسخن عالورقة وكتب:
يبقى انت مستعد إن حد يقرا الكلام ده..
صح!..

ازاي توصل إلي طريق الشهرة من خلال الكتابة

فاللي معوّد نفسه على إنه يكتب لنفسه بس عمر كتاباته ما هتشوف النور
واللي معوّد نفسه انه بيستنى رأي أي حد وعايز يوصل بسرعة
هيزهق بسرعة..
طب نعمل إيه؟!

أياً كانت أسبابك
إنك تبقى مشهور في الكتابة
الطريق واحد: الصبر..

لازم تبقى كرييتف في كل خطوة تخطيها
وتعمل اللي محدش عمله
تعمل مكان خاص كده في قلب كل واحد بيقرالك حتى لو بقوا 10 بس
المهم تكون مأثر فيهم وعارفين طريقتك المميزة في الكتابة..

ودي شوية أفكار كرييتف لطريقك في الشهرة..

1. اعمل صفحة باسمك (بالعربي والانجلش)
   عشان تجمع عليها كل حاجة بتكتبها وقدام الناس لما تيجي تدور عليك الموضوع ميبقاش صعب
2. حط عليها بس الحاجات المميزة اللي بتكتبها متحطش أي حاجة شخصية غير صورتك بس ⁦
3. شوف الترند ماشي ازاي في الحاجات اللي شبهك وحاول تتفوق عليه مش تقلد بس
   (يعني دلوقتي اللي ماشي صور سكرينات من الواتساب
   أو اي ابليكشن فيها مسدج معينة ومكتوب على الصورة كلام بالفصحى أو الانجلش
   قبله كان فيه الترند بتاع الصور التجريدية واللوحات اللي مكتوب عليها جملة قصيرة وهكذا)
4. نزل بوست في أكتر وقت فيه تفاعل واعمله إعلانات
   حتى لو بمبلغ صغير أو خلي حد يساعدك
5. حاول توصل لناقد أو حد تقيل في المجال يتكلم عن قصة كتبتها أو عن طريقة كتابتك في العموم ⁦
6. حاول تستخدم المعارف اللي عندك عشان يساعدوك توصل لقناة أو خبر في جرنان عن كتابك⁦⁩
7. لو لسة بتبدأ بس مستواك كويس
   جرب ترتجل مع حد معروف وتستأذنه في إنكوا تكتبوا سوا حاجة ارتجالية والناس تقول رأيها
8. قرب من ناس في نفس مجالك
   خلي بالك انت عبارة عن مجموع صفات أقرب 5 ليك،
   فيستحسن يبقى فيهم واحد كاتب عالأقل
9. لو بدأت من عالسوشيال ميديا من غير كتاب حتى
   وبدأت عملت اعلانات او دفعت لصفحات مقابل النشر عندهم
   (بشرط يكونوا في نفس مجال الكتابة) ممكن توصل لعدد متابعين كويس
10. اما لو عندك الكتاب يبقى الموضوع أسهل
    ابدأ اعمل اوفرز وهدايا كتير وخلي كل الناس تسمع عن الكتاب والبيع هييجي بعدين

اسعي

اتشقلب واعمل أي حاجة عشان توصل
بس خليك عارف إن في المجال ده بالذات الوصول مش بالسهولة دي..
عشان توصل صح العبها صح

واستمتع بالطريق عشان لحظة النهاية هتبقى جميلة أوي وكل التعب هيهون ?
وأخيراً..

الكتابة بتهوّن كتير
وعلى قد ما هي مش مجال مربح بشكل مرضي وطريقها متعب لإنها بتستلزم مجهود ذهني رهيب
لكن مجرد ما الكلام يطلع منك عالورق بشكل مرتب عن اللي في دماغك بتتبسط أوي، وبتحس بالإنجاز..

هي صديقك اللي هيهون عليك الطريق وهيساعدك كتير أوي لما تتعب وتقع
ولما الأوقات الصعبة تعدي هتكون هي برضه جنبك عشان تعرف تعبر عن فرحتك..
فمتبطلوش تكتبوا!
مية البطيخ .. #سماح_هشام.
كتب بواسطة.سماح هاشم

اقرأ ايضاً:

علم البرمجة اللغوية العصبية: ما هو هذا العلم وكيف نطبقه
البرمجة اللغوية العصبية: الشخص اللى بيبصلك بفضول
الحروف الألمانية على الكيبورد