ما هو موقع لينكد ان (Linked In) ؟ومميزاته
![](https://freecoursesandbooks.net/wp-content/themes/publisher/images/default-thumb/full.png)
“LinkedIn is the new Facebook..” المقولة دى صح بنسبة 100% بالنسبة للشخصيات التطبيقية أو العملية.. هنكلم عن موقع لينكد ان في المقالة دي.
أخبارك إيه النهارده.. يومنا النهارده هيكون عن ال Linkedin..
أنا محمود غزلان ودي مقالة جديدة فى فقرة (وزير الPR)..
لما بتيجي تعمل أكونت على أبلكيشن “لينكد إن” ..
لسبب من أربعة (شغل – منح – تدريب – تعمل Brand لمجالك)..
وممكن جدًا تكون عايز تعمله عشان تحقق الأربعة في وقت واحد..
موقع لينكد ان
ايه هو موقع لينكد ان
□ تعالى في البداية أعرفك ايه هو LinkedIn أصلًا ؟!
ببساطة “لينكد إن” عبارة عن منصة من منصات التواصل الأون لاين بس مختلفة عن باقي المنصات..
لأنه احترافي أكتر..
أنت فى المكان ده بتكون كل حاجة حواليك عبارة عن “شغل”..
- نصايح شغل..
- فرص شغل..
- مشاكل شغل..
- حلول لمشاكل شغل..
- تدريبات لشغل..
- كورسات لتأهيل فى شغل..
- منح لشغل..
ببساطة..
المكان ده أكبر شبكة علاقات وخبرات ممكن تشوفها في العالم كله..
كل الناس اللى موجودين عليه بيشاركوا خبراتهم وتجاربهم مع غيرهم، ويوميًا بيكون عليه فرص لكل اللى فوق ده.. يعنى..
الفرص اللى بيوفرها لك الموقع ده أو التطبيق ده تستحق إنك تديله من وقتك اليوم ولو ساعة ولا لا ؟!
– اه طبعًا يستحق إنك تديله من وقتك وأكتر من ساعة كمان..
أنا أوقات كتير كنت بنام وأصحى وأنام وأصحى على لينكد إن ده .. رغم إن الأكونت بتاعى عليه أنا مش موضحه قد كده إلا إنى بدأت أركز عليه الفترة الاخيرة أكتر..
– تعالى أعد لك الفرص اللى ممكن تعملها منه وتجيلك منه..
الفرص اللي بيوفرها موقع لينكد ان
1- من خلاله تقدر إنك تظهر وتسوق لنفسك بالرغم من الزحام الموجود في سوق العمل، لأن كل ما زادت قدرتك علي استخدامة بإحترافية وعرض خبراتك ومهاراتك هتزيد فرصتك في التميز وسط سوق العمل وفي مجالك..
2- تقدر من خلالة إنك تقرأ مقالات قوية ومفيدة جدًا في تخصصك، وتتابع كل حاجة جديدة بالنسبة لمجالك..
3- تقدر منه إنك تعرض خبراتك ومهاراتك وكل حاجة عنك في شكل إحترافي مشابه تماما لل CV او ال Resume ويكون مُتاح لكل الناس..
4- شايف الشركة اللى بتحلم بيها اللى نفسك تشتغل فيها لما تتخرج؟!
تقدر منه إنك توصلها لأن كل مسؤولين التوظيف أو ال HR / Recruiters موجودين عليه وشايفينه أنسب بيئة للتوظيف وإنهم يلاقوا موظفين كفاءات.
200% من الشركات في العالم بتعلن عن وظائفها بشكل حصري علي لينكد إن..
5- لينكد إن بيئة عظيمة للعلاقات القوية طويلة المدى تقدر تزود شبكة علاقاتك بسهولة فيه لأن كل الناس عارفين إنه للشغل وبس..
6- تقدر منه تلاقى فرص تدريب فى الشركات لأن برضه كل مسؤولى التدريب موجودين عليه مجرد ما تبحث عن اسم الشركة وتختار من ضمن إختياراتها (مكان عمل الشخص) هتلاقى كل موظفين الشركة ظهروا لك تقدر تعمل connections ممتازة معاهم وكذلك الوضع للمنح والشغل..
(مميزات لينكد إن أكتر مما تتخيل بس أنا هكتفى ب دول)
ازاي اجيب شغل او تدريب منه
■ طيب نيجى لسؤال أهم من اللى فاتوا دول..
= إزاي أجيب شغل أو تدريب أو منحة عن طريق موقع لينكد ان ؟!
عشان تعرف تجيب شغل أو تدريب أو منحة، لازم فى البداية تكون Professional.. ومش معنى بروفيشنال إنك تنشر بوستز عليه عن الشغل أو عن إنجازاتك فى التيمات التطوعية..
يبقي السؤال الصح دلوقتى .. إزاى أعمل أكونت LinkedIn صح ؟!
تعالي واحدة واحدة كده هقولك إزاى تخلى البروفايل بتاعك Professional وتعمل صح جدًا..
البروفايل فى LINKED IN بيتقسم ل Topics (يعنى مواضيع) مش زى الفيس سايح على بعضه..
لازم كل Topic منهم تاخد بالك منه أوى أوى وتحط فيه الأمور بتنسيق كويس أوى أوى..
أول حاجة عندك Profile Photo (صورتك الشخصية)
• لازم تحط صورتك أنت .. مفيش صور ورد ولا صور عباد الشمس (مش معنى إنى ك “غزلان” بحبه يبقي أروح احطه صورة بروفايلى)
• الصورة بتاعتك لازم تكون formal مش سيلفي، مش مع أصحابك في فرح وتقص نفسك منها.. يعنى ببساطة صورة جواز السفر بتاعك لو تقدر..
• لازم وشك يبقى واضح فيها كويس أوى أوى مش ضرورى جسمك الأهم وشك..
تانى حاجة عندك Cover Picture صورة الكوفر بتاعك
-حاول تحط صورة بتعبر عنك (هوايتك المفضلة ، مجال شغلك ، أسلوبك في الحياة ، …).. كمثال أنا ك “غزلان” بحب الفضاء جدًا و إدمان عندى أى حاجة للفضاء .. ف حاطط صورة كوكب الأرض من الفضاء..
ملحوظة: (عشان تغير الCover Photo لازم تفتح LinkedIn من الكمبيوتر مش من الموبايل..)
![](https://www.thesocialmediahat.com/wp-content/uploads/2019/08/LinkedIn-New-Cover-Photo.png)
● تالت حاجة معانا Job Title (Profile Header) المسمى الوظيفى بتاعك
بيكون هو أول كلمة بيقع عليها عين الشخص اللى بيدخل البروفايل بتاعك علي موقع لينكد ان ..
• لازم تكتبه بدقة وبصورة محددة وتكتب فيه أنت شغال ايه حاليًا.. أو ال Position بتاعك إيه بالظبط..
● رابع حاجة ال Summary أو الBio بتاعك فى لينكد إن
وده مش بتكتب فيه حكم زى الفيس بوك..
فى ال Summary بتاعك بتوصف نفسك، أنت عملت إيه في حياتك، الوظائف اللي اشتغلتها، إنجازاتك، إزاي دايمًا بتطور من نفسك..
• وتكون عظيم أوى لو عندك CV وضفته فى ال Summary ده.. وهبقي أبعت لك لينك بوست عمل الCv إن شاء الله ضمن اللينكات اللى هبعتها لك فى آخر البوست..
= ملحوظة: (عشان ترفع ال CV بتاعك ف أنت بتحطه فى لينك Google Drive وبعد كده تاخد اللينك كوبى وتحطه ف الSummary بتاعك)
..
= ملحوظة 2 : ( لما ترفع أي فايل علي Google Drive أو غيره لازم تفعل خاصية Link Sharing (مشاركة اللينك) عشان لما أي حد يضغط علي اللينك، الفايل يفتح معاه .. وللأسف دي مشكلة كبيرة معظمنا بيقع فيها..)
• حط رقم موبايلك وإيميلك، لإن لو حد عايز يتواصل معاك وهو مش من الConnections بتوعك مش هيقدر يشوف الContacts بتاعتك ولا هيعرف يوصلك..
خامس حاجة معانا ال Experience الخبرات بتاعتك لو معاك..
• نفس فكرة طريقة كتابتها فى ال CV بالظبط من الأحدث الى الأقدم وكمان بتضيف معاها سطر أو اتنين بال (Responsibilities & Achievements) بتاعك فيها المسؤوليات والحاجات اللى حققتها..
• لو خريج فريش أو لسه طالب ممكن تحط التدريبات اللي حصلت عليها في الشركات المختلفة..
● سادس حاجه معانا ال Education بتاعك..
• الكلية بتاعتك والشهادات اللي حصلت عليها زي الماجستير إذا فيه أو الدكتوراة..
لو مفيش بتكتب إنك (خريج كلية كذا – القسم – الشعبة – تحتهم التقدير بتاعك)..
سابع حاجة معانا هى ال (Volunteer work)..
أو ( Extra curricular activities) الأنشطة التطوعية اللى كنت فيها أو مازلت فيها..
• حاول توضح إيه الإنجازات اللي حققتها وإزاي قدرت تفيد المكان ده والناس من خلال خبراتك..
ثامن حاجة معانا هى ال (Skills)
• هنا بتذكر الSkills اللي عندك ومهاراتك في المجالات المختلفة..
● تاسع حاجة معانا وهى ال (Recommendations)
أو التوصيات والتأكيد على كلامك من جهة الناس اللى اشتغلت أو اتطوعت معاهم..
• الناس اللي اتعاملت معاهم ممكن يكتبوا توصيات عنك يعني يذكروا مميزاتك، وممكن تضيف ال Connections بتوعك اللى بتعتبرهم Reference ليك ولشغلك..
● رقم 10 بقي ومن الأجزاء المهملة ومهمة وأنا شخصيًا مكنتش عاملها (Accomplishments)..
وهى بتتكون من كذا جزء:
☆ الCourses
☆ ال Certifications (الشهادات اللى معاك)
(ممكن ترفع الشهادات علي Google Drive وتحط اللينك بتاعهم)
☆ ال Languages اللغة ومستواك فيها إيه..
● آخر حاجة معانا
و أهم حاجة لازم تضيفها ف النهاية ال Contact بتاعتك.. اللى عن طريقها الناس تتواصل معاك..
☆ رقم تليفونك اللي بتستخدمه في الشغل مش العائلي
☆ الإيميل بتاعك ويكون Formal..
كمثال : [email protected]
بلاش soso و lolo و toto..
☆ لينك الفيسبوك بتاعك فى حالة لو كل اللى فوق ده كان مقفول مع الشخص فيلجأ للفيس بتاعك..
☆ لو عندك أكونت على Wuzzuf حطه.. لو معندكش خلاص..
فى النهاية خلى الأكونت ده بيعبر عنك وعن اللى عملته فى حياتك بالظبط.. بلاش تبالغ وبلاش تكتب أى كلام وبلاش تحشي أى حاجة وخلاص مش مهمة.. بس اكتب كل حاجة عنك على ال11 Topic اللى فوق..
● الخاتمة بقي..
حاول إن يكون لك تواجد علي LinkedIn..
يعنى تنزل مقالات وتشير وتعلق علي بوستات، وحاول تخلي مشاركاتك مفيدة متنشرش أى كلام فاضي أو ملهوش لازمة..
● حاول تخلي عندك Connections كتير حتى لو معندكش Followers كتير .. بس بيكون كويس جدًا إن يكون عندك ناس تستفيد منهم في مختلف المجالات اللى أنت مهتم بيها مش بس في مجالك..
لو محتاج تطلع تدريب أو منحة أو شغل فى شركة ما ابحث ب اسم الشركة فى ال Search وحدد إن ده المكان اللى الشخص شغال فيه هيظهر لك كل الناس اللى فى الشركة..
● تابع الناس اللي بينزلوا وظائف ومحتوي هادف ونصائح مهنية علي LinkedIn …
هتستفيد منهم جدًا..
وأنا هساعدك فى ده وهحط لك 15 أكونت ممتازين تتابعهم على لينكد إن..
ضمن اللينكات اللى هبعتها لك + كمان هحط لك 5 طرق عظيمة تستغلهم فى تعليم حاجات كتير عن Linkedin وتستخدمه صح..
هتلاقى على اللينك ده المقالات بتاعتى اللى فاتت.. ولو عايز توصلها عن طريق الفيس ادخل على الهاشتاج اللى تحت وزير الPR ..
اقرأ ايضاً:
كيفية تعلم اللغة الإيطالية للمبتدئين بسهولة ومجاناً
كيفية تحدث الانجليزية بطلاقة بدون الحاجة الي معلم
سلسلة تعلم اللغة الإنجليزية بشكل مجاني للمبتدئيين