كيفية تعلم اللغة الإيطالية للمبتدئين بسهولة ومجاناً
![](https://freecoursesandbooks.net/wp-content/themes/publisher/images/default-thumb/full.png)
في المقالة دي هنتكلم عن إزاي تتعلم اللغة الإيطالية لو انت مبتدئ ويكون بشكل سهل وسريع ومجاني كمان.
بداية، لو مش قرأت المنشور الخاص بتعلم اللغات بشكل عام، أنصحك تقرأه.
علشان فيه تطبيقات ومواقع ذكرناها هناك فهكتفي بالإشارة ليها هنا دون توفير روابط أو وصف للموقع أو التطبيق.
رابط المنشور: من هنا
قبل أي حاجة، محتاج تعرف نبذة عن اللغة، ودة تقدر تعمله من خلال موقع ويكيبيديا أو من خلال موقع 101 Languages.
الخطوات اللي لازم تتبعها عشان تتعلم اللغة الإيطالية
1- تعلم الحروف جيدًا:
ودة لإن اللغة الإيطالية بتُنطَق كما هي مكتوبة، يعني كل الحروف اللي في الكلمة بتتنطق.
وبالتالي لو تعلمت الحروف كويس وطريقة نطقها وكتابتها هيبقى الباقي أسهل مما لو لم تتعلم الحروف بشكل كويس.
ودة تقدر تعمله من خلال إنك تبحث على اليوتيوب عن تعلم الحروف الإيطالية، زي إنك تكتب “Learning Italian Alphabet” وهتلاقي فيديوهات تعلمك الحروف.
*ملحوظة مهمة: لو قرأت منشورات ليا قبل كدة هتعرف إني مش بوفرلك كل حاجة.
يعني هتلاقيني بقولك ابحث عن كذا، ودور على كذا، ولكن بساعدك بتوجيهك للكلمات اللي تبحث بيها مثلا، ودة علشان أنا حابب إنكم تتعودوا على البحث.
2- هتشوف كورسات اللغة الإيطالية على موقع/تطبيق Memrise:
بصراحة هي مش كورسات قوي، هي ميني ميني كورس، ولكنها مفيدة وتقدر تعتبرها كمدخل للغة وإنك تخلي اللغة مألوفة بالنسبة لك.
الكورسات كلها (7 كورسات مقدمة من الموقع نفسه) عبارة عن 50 ساعة تقريبًا بتتعلم فيهم الكلمات والجمل الأساسية في اللغة.
وتقدر تتعلمهم من خلال إنك تدخل على الموقع أو البرنامج، وتختار اللغة اللي إنت بتتحدثها واللغة اللي إنت حابب تتعلمها (الإيطالية في حالتنا)، وعيش.
*ملحوظة: هتلاقي كورسات إيطالي كتير، ولكن زي مقولتلك، إنت مطلوب منك تاخد الـ 7 كورسات اللي مُقدمين من الموقع نفسه.
(هتلاقي جنب الكورس كلمة By:Memrise) ومترتبين من 1-7.
طبعا في المستقبل تقدر تشوف أي كورس يعجبك، ولكن حاليا إتبع الخطوات دي لحد لما تشد حيلك في اللغة.
3- لما تتعمق في اللغة
المفروض في النقطة دي تكون اللغة بدأت تبقى مألوفة بالنسبة لك، ولكن في الخطوة دي هنخليها مألوفة أكثر.
- هتدخل على القناة دي: من هنا
وتبدأ بقائمة تشغيل (Italian course – Beginner Series)، هي في الحقيقة مش كورس قوي، ولكن فيها حاجات مفيدة جدا هتهتاجها.
بعد كدة هتشوف قائمة تشغيل (Italian Course – Intermediate Series).
ومن ثم قائمة تشغيل (Learn Italian) على نفس القناة.
- -بعد كدة هتدخل على القناة دي: من هنا
وتبدأ تشوف قوائم التشغيل اللي عليها ولكن بشرط إن القائمة اللي تبدأ فيها لا تنتقل لغيرها إلا لما تنتهي منها.
ولكن حاول تراعي مستواك والحاجة اللي إنت عايز تتعلمها، وابدأ بيه.
- كذلك قناة ItalianPod 101
من القنوات اللي بتوفر فيديوهات قيِّمة جدًا.
فياريت تدخلوا تبحثوا عنها وتشوفوا الفيديوهات اللي عليها بناءًا على الحاجة اللي حابين تتعلموها.
4- تعلم الكلمات:
لحد دلوقتي المفروض يكون عندك حصيلة لا بأس بها من الكلمات والجمل (لإنك المفروض بتدون الكلمات والجمل اللي بتتعلمها وبتراجعها باستمرار)، ولكن مازالنا محتاجين نبني حصيلة لغوية أكبر، وهنا يأتي دور قامورس (Italian-English Bilingual Visual Dictionary)، وهو قاموس مقسم الكلمات تَبعًا للموضوع، والكلمات موضحة من خلال صور بالإضافة للمرادف لها باللغة الإنجليزية.
-طيب، طريقة التعلم هتبقى إزاي؟
بعد لما تحمل الكتاب (القاموس)، هتبدأ تستخدم قاموس Reverso علشان تعرف معاني الكلمة وتشوف أمثلة عليها.
رابط القاموس: من هنا
القاموس ليه تطبيق للهواتف، ولكن أنا أنصحكم بنسخة سطح المكتب فهي أفضل وأسرع.
أما بالنسبة لنطق الكلمات، فدة هنتعلمه من موقع تاني، ناس حقيقية هي اللي بتنطق الكلمات مش كمبيوتر، وهو موقع Forvo.
رابط الموقع: من هنا
هتدخل تكتب الكلمة في مربع البحث، وهيظهر لك أكثر من نطق لها لناس متحدثين أصليين باللغة.
5- نيجي بعد كدة لتعلم الكلمات الأكثر شيوعًا في اللغة الإيطالية:
طبعا بعد لما تخلص القاموس اللي فات هيكون عندك حصيلة لغوية محترمة، ولكن الـ 1000 كلمة الأكثر شيوعًا هيساعدوك بشكل كبير في الحوارات اليومية وكذلك تقدر تعتبرهم بمثابة مراجعة للكلمات اللي هتقابلك وإنت إتعلمتها من القاموس، ودول هتلاقيهم في الرابط اللي موجود في آخر المنشور.
وبالنسبة لطريقة تعلم الكلمات، فهي نفس الطريقة السابقة.
6- القواعد:
قواعد اللغة الإيطالية Tricky شوية وهتحتاج منك شوية وقت في الأول، ولكن دة طبيعي كونها لغة جديدة علينا.
القواعد هنتعلمها من كتاب (Practice makes perfect – Complete Italian grammar) واللي تقدروا تحملوه من خلال الرابط اللي في نهاية المنشور.
7- مجموعة كورسات (Italian Language and Culture) على موقع EDX:
الكورسات دي بتتكلم عن اللغة والثقافة الإيطالية، ودة شيء مهم جدًا وهو معرفة ثقافة البلد اللي بتتعلم لغتها مش بس اللغة، ودة اللي هيعمله مجموعة الكورسات دي.
المجموعة عبارة عن 3 كورسات، المستوى المبتدئ، المتوسط والمتقدم، وكل كورس محتاج وقت 60 ساعة لمذاكرته.
روابط الكورسات:
الكورس الأول
الكورس الثانى
الكورس الثالث
أنصحكم إنكم تدرسوا الكورسات دي جنبًا إلى جنب مع الكلمات والقواعد.
رابط الكتب وقائمة الكلمات: من هنا
ملحوظات:
1- الممارسة مهمة جدًا، ودي تقدر تعملها من خلال تطبيق/موقع Speaky اللي إتكلمنا عنه قبل كدة، ولكن لابد يكون مستواك فوق مبتدأ على الأقل وبتعرف تتكلم في الأساسيات علشان تلاقي حد يستمر معاك، لإن ببساطة محدش عنده استعداد يعلم حد، كله هناك علشان يمارس
2- أكيد هيقف معاك حاجات مش هتفهمها من الكتب بطبيعة الحال، فهتحتاج فيديوهات توضحها، ابحث على اليوتيوب وهتلاقي عشرات (إن لم يكن مئات) الفيديوهات.
بالتوفيق للجميع
– المنشور للصديق لطفي الطوخي
– لو محتاج المنشورات السابقة موجودين هنا :- من هنا