كيفية تحدث الانجليزية بطلاقة بدون الحاجة الي معلم

في المقالة دي هنساعدكم في ازاي تحدث الانجليزية بطلاقة من غير ما تحتاج لمدرس او حد يعلمك وكمان بشكل مجاني. اتكلم إنجليزي بطلاقة ببلاش وربنا ينفع بينا وبيكم.

تحدث الانجليزية بطلاقة

التحدث

واحد من اهم عواميد اللغة هو عمود التحدث، لكن قبل ما نتكلم عن عمود التحدث خلينا نشوف المشهد ده بين أنس وسمير.

أنس: يا سمير عايز أتعلم السواقة.
سمير: يابني دي أسهل حاجة متقلقش.
أنس: طب يلا علمني.
سمير: بص يا سيدي دي عصاية الغيارات، وده الدريكسيون، ودي الدوسات، كل اللي عليك هتجيب الغيار الأول وبعد كده تزود بنزين.
أنس: طب يا عم ما السواقة طلعت سهلة أهي.
بس كده وجه صاحبنا أنس اشترى عربية وجيه يسوق بوظ الدنيا خالص؛ وده لإنه باختصار عرف أساسيات السواقة وعرف إزاي يسوق بس ما طبقش عملي ومارس كتير عشان يحترف السواقة.

*تحدث اللغة بالظبط زيه زي السواقة، كل الناس عارفة قواعد ”grammar” وحافظين كلمات بالآلاف، لكن مبتمارسش وتطبق اللي بتتعلمه.
عشان كده بيكون لسانهم تقيل وكمان لما بيجوا يتكلموا بيبوظوا الدنيا وغلطات كتير بقى متتعدش.
ده غير إنه كل شوية بي stutter ”بيتهته” لإنه بيقعد يفكر بالعربي وبعد كده بيترجم العربي لإنجلش فحلني بقى على ما يقول جملتين ورا بعض.

• طب أنا أعمل إيه عشان أحسِّن مهارة التحدث عندي؟

1- أولًا عشان تفك لسانك وكمان تحسن من النطق بتاعك لازم تعمل ”shadowing” .

يعني إيه؟.
يعني لازم تجيب مقطع صوتي أو مقطع إنت بتحبه من فيلم معين وتقعد تسمعه كتير جدًا جدًا لغاية ما تتقنه.
وبعد كده تحاول إنك تقلده بنفس السرعة وبنفس طريقة الكلام وبعد كده تسجل نفسك وتحاول تسمع اللي إنت سجلته وتقارنه بالفيديو أو المقطع الصوتي الأصلي.

طب لو مبتدأ خالص وحاسس إنك مش عارف تلقط الكلام الي بتسمعه كويس تعمل إيه؟

• بص فيه برنامج اسمه potplayer تقدر من خلاله إنك تبطئ الحاجه اللي إنت بتسمعها لغاية ماتكون بطيئة خالص وتبقى قادر تسمع كل كلمة وتفهم اللي بتسمعه كويس جدًا.
  ده لينك البرنامج: من هنا
• ومن أفضل الحاجات اللي ممكن تستخدمها في الـshadowing مقاطع الفيديو اللي على موقع Voscrean.
  ده لينك الموقع: من هنا
• برده في موقع Esl lab فيه جزء فيه اسمه train your accent أكثر من رائع في إنك تسمعه وتقلده وتحاول تردد معاه بنفس السرعة.
  ده اللينك بتاعه: trainyouraccent

فيه بقى حته كده للناس الكويسة في اللغة.
وهي إنك تسمع الأوديو كويس وبعد كده تحاول تسجل نفسك مرة وإنت بتقوله ببطئ خالص.
وبتنطق كل كلمه واضحة جدًا، وبعد كده تسجل نفسك مرة وإنت بتقوله بسرعة جدًا أسرع من الأوديو الأصلي.

2- لازم بقى تمارس اللغة

تتكلم مع حد عشان تعيش اللغة وتقدر تكسر الخوف اللي جواك اللي ممكن يضيع منك فرص شغل كتير جدًا إنت بتحلم بيها من زمان.

• فيه أماكن كتير ممكن تروحها و تمارس اللغة وتتكلم مع ناس زيك عايزه برده تتعلم وعندها شغف للتعلم.
• فيه السفارة الأمريكية ممكن تروح تعمل عضوية بصورة البطاقة وتحضر معاهم كل أسبوع في المحادثة وتتكلم مع ناس مجانًا من غير فلوس، ده غير باقي الخدمات اللي بيقدموها.

طب لو إنت مش فاضي تروح الأماكن دي، فيه مواقع من خلالها تقدر تتكلم مع ناس أجانب وتتكلم معاهم إنجلش.إنت بتعلمهم عربي وهما بيعلموك إنجلش

دي أشهر المواقع عشان تكون قادر علي تحدث الانجليزية بطلاقة:

1. speaky
   speaky
2. hello talk
   hellotalk
3. ‏Italki
   italki
4. ‏Bussu
   busuu
5. ‏verbling
   verbling

أو ممكن برده تدخل على موقع ESL conversation هتلاقي مواضيع كتير جدًا، ممكن تختار أي موضوع وهتلاقي أسئلة عن الموضوع كتير جدًا.
ممكن تناقش الأسئلة دي وتتكلم عنها مع نفسك وبرده سجل لنفسك وبعد كده اسمع اللي سجلته.
وحاول تشوف إيه أخطائك أو ممكن تبعتها لواحد صاحبك إنت شايف إنه أحسن منك وتخليه يقولك على أخطائك ويصححهالك.
‏من هنا

طب لو إنت عملت الحاجات دي كلها ولقيت نفسك بتتكلم كويس ممكن بقى تعمل حاجه كده بسيطة هتعلي من مستواك جدًا في التحدث وكمان هيعلي من الطلاقة بتاعتك ”fluency“.
ببساطة اختار أي كلمة ولتكن مثلًا “home” وشغل الـ stop watch عندك.
وابدأ اتكلم مع نفسك عن الكل دي لمده دقيقة من غير ما توقف، وبعد كده ممكن تزود الدقيقه تخليها 2، 3، 4.
ممكن برده تصعب الكلمة وتخليها أصعب شوية مثلًا زي ”marriage” وهكذا.
وممكن تلعب اللعبة دي مع واحد صاحبك واتحدوا بعض هتبقى فعلًا تحدي وهتكون رائعة جدًا.

بس برده خليني أقولك إنك لو ليك صحاب عايزين يتعلموا إنجلش فأفضل حاجة وهي إنكم تمارسوا اللغة كل يوم مع بعض.
وتتكلموا كل يوم ساعة سواء offline بإنكم تتجمعوا وتتكلموا مع بعض أو online، ومن أشهر المواقع اللي ممكن تستخدموها هو برنامج زووم وده اللينك بتاعه:
https://en.freedownloadmanager.org/Windows-PC/Zoom-Meetings.html

3- في الآخر خالص عشان تحدث الانجليزية بطلاقة

أحب أقولك متوهمش نفسك بإنك مش عارف تتكلم أو إن التحدث مع الناس صعب.
يعني لو مثلًا فيه عندك presentation في الكلية وإنت خايف جدًا ومش عارف هتتكلم إزاي.
ومرة واحدة الدكتور قالك ممكن تقوله بالعربي هتلاقيك فرحت جدًا وقولتله إشطة جدًا مفيش مشكلة.

كل الناس بتخاف تتكلم عشان بتخاف تغلط والناس تعدل عليها أو تتريق عليها>
لو عايز تتعلم إنجلش فحرفيًا خليك إنسان بارد مبيفرقش معاه كلام الناس، واعرف إنك كل ما تغلط كل ما هتتكلم وتتعلم أسرع.

زي ما المقولة المشهورة بتقول”the more mistakes you make ,the more you learn“.
فاغلط واخرب الدنيا وإنت هتبقي سواق محترم، أقصد متكلم محترف؛ لإن مفيش حد بيبقى سواق على وضعه إلا لما بيخبط العربية كذا مرة، وخليك دايمًا فاكر إن “practice makes perfect“.

متنساش تعمل شير وخلي غيرك يستفيد ولو عندك أي استفسار سيبوا في تعليق وبإذن الله هرد عليك.

كتبه :- انس محمد مصطفي

اقرأ ايضاً:

كيفية تذكر ما قرأت؟ مراحل حفظ ما تم قراءته