أحياء الصف الثاني الثانوي “باب الإخراج” الجزء الثاني
عرفنا عزيزي القارئ في “باب الإخراج” في أحياء الصف الثاني الثانوي عملية الإخراج والمادة الضارة اللي المفروض تخرج.
و دلوقتي هنعرف العضو اللي بيخرج المادة دي وازاي بيخرجها برا الجسم.
=الجلد عزيزي القارئ أكبر أعضاء جسم الإنسان.. مساحة سطحه بتوصل لـ 1,95 متر مربع.
عزيزي القارئ متوسط وزن الجلد في الشخص العادي بتصل لـ 4,5 كيلوجرام تقريباً.
والوزن ده عزيزي القارئ أكبر من ضعف وزن الدماغ.
مش بس كده، الجلد واحد من أهم أعضاء الإخراج.
أحياء الصف الثاني الثانوي:
الجلد في جسم الإنسان بيتكون من طبقتين رئيسيتين:
أول طبقة فيهم: اسمها البشرة أو (epidermis):
هي الطبقة الخارجية للجلد وبتتكون من خلايا طلائية، تسألني إيه هي الخلايا الطلائية دي؟
*الخلايا الطلائية أو ما تسمى بـ الظِّهَارَة:
هي مجموعة من الخلايا تتحد معًا لـتغطي أحد اعضاء الجسم والخلايا دي عزيزي القارئ بتبطن القنوات ذات الفتحات الى الخارج.
الخلايا الطلائية اللي موجودة في البشرة سُمْكها يبلغ من ١٠ : ٣٠ خليةالبشرة عزيزي القارئ هي الجلد اللي ظاهر لك (بشرتك).
البشرة بتتكون من فتحات صغيرة ودقيقة تسمى “المسام أو pores”.
الفتحات دي هي اللي بيخرج منها “المادة الإخراجية الضارة” علشان كده عزيزي القارئ البشرة بتتكون من خلايا طلائية.
لأن الخلايا الطلائية بتبطن القنوات اللي بتفتح على سطح البشرة.
أحياء الصف الثاني الثانوي بيقول البشرة بتتكون من طبقة سطحية (علوية) وطبقة داخلية (منخفضة).
= الطبقة السطحية:
بتتكون من خلايا ميتة، الخلايا دي بتحتوي على مادة بروتونية عازلة للمياة اسمها “الكيراتين”.
أي ميكروب بيحاول يدخل جسمك عن طريق الجلد مادة الكيراتين دي بتمنعه، المادة بتقول للميكروب (لا وقف عندك ممنوع تدخل).
في أيام الكورونا الأطباء بينصحونا بغسل اليدين والاستحمام يوميًا، فـبعد غسل اليدين أو الاستحمام بييجي وقت التجفيف بـالمنشفة.
أحب أقولك عزيزي القارئ إن معظم الخلايا الميتة اللي موجودة على الطبقة السطحية بيقع من على جلدك.
سامع صوتك بتقول “ايه ده طب ما الخلايا دي فيها الكيراتين اللي بيحميني من الميكروبات، طب كده الميكروبات هتدخل جسمي”
لا عزيزي القارئ ما تقلقش، ليه بقى؟
لإن البشرة بتتكون من طبقتين، الطبقة اللي فيها الخلايا الميتة والطبقة التانية اسمها طبقة داخلية (منخفضة)؛
الطبقة الداخلية:
دي بتتكون من خلايا حية،الخلايا الحية دي بتتجدد باستمرار.
المهم انث الطبقة الداخلية دي كل شوية بتقول لـمجموعة من خلاياها “يلا لموا شنطكم علشان هتسافروا للطبقة السطحية”.
وبالفعل ده اللي بيحصل و بياخدوا بعضهم وبيسافروا للطبقة السطحية وأول ما يوصلوا بيموتوا وبيتحولوا لـخلايا ميتة تحتوي على مادة الكيراتين.
الطبقة الداخلية ليها قاعدة، في قاعدتها بيوجد خلايا صبغية، الخلايا دي بتفرز حبيبات مهمة جدًا اسمها …
“حبيبات الميلانين” في أحياء الصف الثاني الثانوي :-
الحبيبات دي بتحمي جسمك من الأشعة فوق البنفسجية الضارة والحبيبات دي بتدي للجلد لونه (يعني فاتح أو غامق أو نص نص).
تسألني “طب هي الحبيبات دي بتدي للجلد أي لون كده من غير قاعدة (بطريقة عشوائية يعني؟).
لا عزيزي القارئ، كمية الملانين اللي بيتم إفرازها بتبقى على حسب درجة حرارة الشمس في المنطقة اللي انت موجود فيها.
علشان كده عزيزي القارئ بتلاقي إن سكان جنوب إفريقيا بشرتهم غامقة وده لإن الطبقة الداخلية في البشرة بتفرز ميلانين كتير علشان يحمي الجسم من أشعة الشمس.
وبتلاقي سكان أوروبا بشرتهم فاتحة لإن الشمس بتظهرعندهم فين وفين ولمَّا تظهرمش بتكون شديدة.
علشان كده عزيزي القارئ بشرتهم مش بتحتاج تفرز ميلانين كتير.
علشان تحميهم من الشمس لإنها أصلًا مش شديدة وده لمَّا تقرر أصلًا إنها تظهر.
احنا قلنا عزيزي القارئ إن الجلد بيتكون من طبقتين رئيستين.
وعرفنا إن الطبقة الأولى اسمها البشرة، تعالى نبدأ في تاني طبقة ألا وهي “الأدمة او Dermis”
الأدمة او Dermis في أحياء الصف الثاني الثانوي :-
عزيزي القارئ تُعْرف بإسم “الطبقة الداخلية السميكة بالجلد” و بتتكون بشكل أساسي من أنسجة ضامة، تسألني “إيه هي الأنسجة الضامة؟ “.
الأدمة بتتكون من النسيج الضام لإن النسيج الضام بيوفر لها الوسط الملائم.
علشان الأكسجين والجلوكوز والفضلات تقدر تنتقل من الشعيرات الدموية إلى مكونات الأدمة (زي الشعرة والغدد العرقية).
من أهم مكونات الأدمة -: “الغدد العرقية”، و ده لأن عملية الإخراج بتم فيها.
عزيزي القارئ، أولًا لازم تعرف إن المواد اللي الجلد بيخرجها من الجسم هي الأملاح والماء وبتخرج برضه الفضلات النيتروجينية بس بتبقى نسبة الفضلات قليلة.
نرجع للغدة العرقية في أحياء الصف الثاني الثانوي :-
هي عبارة عن أنبوبة كثيرة الالتفات من عند جزئها السفلي (هي موجودة في قاع طبقة الأدمة. وبدايتها من القاع، البدايه دي زي خرطوم المياه وهو ملتف حوالين نفسه على الأرض كده)،
الخرطوم ده محاط بالكثير من الأوعية الدموية الشعرية، كل ده في بدايتها بس لما تيجي تطلع لـفوق (بتقرب من الطبقة الداخلية للبشرة) بتبقى عبارة عن أنبوبة طويلة غير ملتفة.
أهم حاجة عزيزي القارئ إن الأنبوبة الطويلة دي (الغدة العرقية) بتفضل تطلع تطلع لحد ما توصل للطبقة السطحية في البشرة وبتظهر على شكل فتحات اسمها “مسام العرق”.
المسام دي هي اللي بتخرج المواد الضارة من جسمك، لو سألتني طب “هي المسام دي بتخرج المواد الضارة ازاي وهل نسبة المواد بتختلف كل فترة؟”.
في فصل الصيف صديقي العزيز الجزء السفلي الملتف من الغدة العرقية بينشط والأوعية الدموية الشعرية بتبدأ تتسع وده علشان يستخلصوا النفايات اللي الجلد مسؤل عن إخراجها.
(ماء وأملاح وفضلات نيتروجينية قليلة) وبعد ما يستخلصوها بيتم طردها من الجسم.
في فصل الشتاء بيقل تنشيط الغدة العرقية والأوعية الدموية الشعرية بتبدأ تضيق وبالتالي الكميه اللي بتستخلصها (المواد الضارة) بتكون قليلة.
بص بقى الدنيا ماشية ازاي، أولًا لازم تعرف إن عملية تجميع البول في المثانة البولية “عملية غير إرادية” أنت مش متحكم فيها؛
فـفي فصل الصيف
“البول اللي بيخرج من الجسم بيكون قليل والبول ده بيتكون من مياه وأملاح وفضلات نيتروجينية” لما يكون البول الخارج من جسمك .
عزيزي القارئ قليل ده هيؤدي إلى زيادة الحموضة ومن نتائج “زيادة الحموضة في الجسم ” ارتفاع درجة الحرارة.
وفعلًا عزيزي القارئ درجه حرارة جسمك بتبدأ تزيد ونسبة البول اللي بتخرج من جسمك برضه قليلة ولو فضل الحال على كدا فـهيحصل تسمم وتموت (بعد الشر يعني).
بس ده عزيزي القارئ مش بيحصل إلا في حالة واحدة بس، اولًا هو مش بيحصل لأن لما درجة الحرارة تبدأ تزيد.
الشعيرات الدموية اللي موجودة حوالين الغدة العرقية بتبدأ توسع وتجمع المواد الضارة وتبعتها للغدد العرقية والغدد العرقية تستلمها وتخرجها بره الجسم عن طريق المسام.
عزيزي القارئ المواد الضارة دي بتخرج على صورة عرق علشان كده اسمها الغدد “العرقية”، طب امتى بقى يحصل تسمم؟
لو أنت عزيزي القارئ ما غسلتش جسمك كل يوم في الصيف؛ العرق اللي خرج من المسام هيبدأ يخلي جسمك لزج ومع الوقت العرق هيسد المسام اللي هو أصلًا بيخرج منها.
طب لما المسام يتسد العرق كده مش هيعرف يخرج، فـفيه كمية منه مش هتخرج مع البول وكل شوية الكمية تزيد ومع الوقت هيختل توازن الجسم وتتعطل العمليات الحيوية.
وبالتالي يحصل تسمم ووفاة وممكن ده ما يحصلش لو الصيف خلص ساعتها .
في الشتاء
بقى بيحصل عكس ده، نسبة البول الخارج بتكون كبيرة ودرجة الحرارة بتكون منخفضة فـالشعيرات الدموية بتنكمش ونشاط الغدد العرقية بيكون قليل فـنسبة العرق بتكون قليلة وبالتالي نسبة البول بتكون كتيرة.
الغدد العرقية عزيزي القارئ بتعمل على خفض درجة الحرارة.
من مكونات الأدمة عزيزي القارئ “الشعرة”.
بداية الشعرة أو الراس بتاعتها اسمها “بصيلة” البصيلة عزيزي القارئ بيحيط بيها الكثير من الشعيرات الدموية والشعيرات دي موجودة علشان تمد البصيلة بالجلوكوز والأكسجين.
كمان عزيزي القارئ بيتصل بالشعرة عضلة أنت ممكن من الخوف شعرك يقف فـلما يقف العضلة دي هتحركه تاني.
لمَّا الشعرة بتبقى خلاص كبرت وبتقرب من منطقه البشرة بيتكون حواليها غدة دهنية، الغدة دي بتفرز مادة دهنية.
المادة دي عزيزي القارئ وظيفتها إنها تسهل عملية خروج الشعرة من الجلد وبتكسب الشعرة ليونة علشان تمنع تقصفها.
# فيه شوية معلومات تاني في الدرس ده، بإذن الله هتتقال في المقال الجاي + تدريبات بنك المعرفة على الدرس.
لينك موقع بنك المعرفه من هنا .
كتبه | اسراء محمد
اقرأ ايضاً: