ما هو الوسواس القهري وعلاجه واعراضه

في هذه المقاله سنتعرف علي ما هو الوسواس القهري وعلاجه أنا حاسس إن دماغي جواها صراعات وحلقات مفرغة من الأفكار اللي مبتخلصش لدرجة إنها أثرت على حياتي وعلاقاتي.
يا عم استعيذ بالله ده تلاقي شيطانك اللي بيوسوسلك.. ده الرد اللي ممكن تسمعه وبنسبة كبيرة كمان.

الوسواس القهري (OCD)

اخذ الناس يفكرون ما هو الوسواس القهري وعلاجه في فترة من الزمن في أوروباز
وبالتحديد ما بين القرنين 14 وال 16 كانوا معتقدين أن الأشخاص اللي عندهم أي أفكار قهرية إنهم ملبسوين.
فكانوا بيلجأوا لعلاج الأفكار دي بالتعاويذ لحد ما جه “فرويد” في القرن العشرين وصنّف الوسواس القهري ضمن الاضطرابات النفسية واللي بتسبب صراعات نفسية داخلية وبتظهر علي شكل أعراض.
⁦⁦⁦⁦ ⁩
منظمة الصحة العالمية صنفت الوسواس القهري من ضمن أكثر 10 أمراض في العالم بتعيق حياة الأشخاص زيه زي الاكتئاب واضطراب ثنائي القطب.
و من 2 ل 3% من الأشخاص في العالم مصابين بالوسواس القهري وفي مصر بالتحديد بيعانوا منه 2,7% من الناس.

⁦⁩ الوسواس القهري هو من الاضطرابات النفسية المرتبطة بالقلق وبيكون مرتبط بأفكار ومخاوف ومعتقدات وصور غير منطقية.

بتبدوا لأصحابها إنها تافهة لكن بتتكرر في دماغ الشخص بشكل مستمر عشان كده اسمها قهرية.
وللأسف كل ما بيحاولوا يقاوموا الأفكار دي كل ما بتزيد عشان كده بيعد من أصعب الأمراض النفسية وبيوضح قد ايه الإنسان ضعيف مهما كان مسيطر وجامد وتيجي شويه أفكار تهدمله حياته.
⁦
وفي بعض الأفلام اللي بتمثل فكرة الوسواس القهري زي As good as it gets ، وThe Aviator، وفي مسلسل كوميدي درامي اسمه Monk ممكن تشوفوهم.

الوسواس القهري وعلاجه واعراضه واسبابه
⁦⁩⁩أعراض الوسواس القهري

بتتمثل في الفكرة اللي بتفضل تدور في دماغ الشخص زي مثلاً أنه قفل باب الشقة وهو خارج على الشغل ولا لأ.
والفكرة دي بتفضل تتكرر بشكل مبالغ فيه فبتحسسه بالتوتر والقلق.
وإنه مش هيرتاح ولا هيهداله بال غير لو أتأكد تاني وثالث وعاشر إذا كان الباب اتقفل ولا لأ فسلوكيًا بيروح يتأكد.
وترجع الفكرة تتكرر تاني وهكذا لحد ما اليوم يعدي وميروحش الشغل.
طب ما احنا كلنا بنعمل كده بس الفرق إن الشخص العادي تكرار الفكرة بالنسباله مش بتسيطر عليه ولا بتوقفه لكن مريض الوسواس القهري الفكرة من كتر ما هي مسيطرة عليه بتعطل حياته.

ومن أشهر أنواع الوسواس القهري

• التأكد والفحص القهري يعني كل شوية يتأكد من كل حاجة
  يعني مثلاً يتأكد إن باب الشقة مقفول والنور مطفي والعربية بتاعته في مكانها.
• وسواس النظافة وده اللي بيخليك تغسل إيدك عشروميت مرة لدرجة إنك ممكن تغسل الصابونة بصابونة تانية
  وده أكثر انتشارًا ما بين المدنيين ورجال الدين ممكن يفضلوا يتوضوا ساعة ويكرروا في الوضوء كثير جدًا.
• وسواس التماثل يعني بيكونوا عايزين أي حاجتين يبقوا زي بعض بالظبط
  يعني لو شاف لوحة مثلاً فيها رسمتين زي بعض بالظبط بيفصل يركز في تفاصيلها لحد ما يتأكد إن الصورتين زي بعض وفي ناس بتعد الشعر بتاع الحلاقة.
• وسواس اجترار الأفكار:
  زي مثلاً يفضل يفكر ربنا خلقنا ليه طب واحنا في الدنيا دي بنعمل ايه وفاكر إنه لما يوصل لحل إنه كدا هيرتاح والأسئلة بتفضل تتكرر وهي ملهاش إجابة.

طب ايه أسبابه؟

• العوامل الوراثية:
  اللي بتتمثل في الجينات وإن الابن واخدها من أحد الأباء ودي بيكون أمرها اصعب شويه في العلاج.
• العوامل النفسية والبيئية:
  زي تربيه الأب والأم لولادهم ومن خلال تربيتهم بيوصلولهم إن كل حاجه لازم تبقي بشكل مثالي.
  وإنك مهما عملت مقصر برضه ومينفعش تعتمد ع نفسك فده بيخلق عنده الشك اللي بيسببلله الوسواس.
• وخطأ في التواصل مع بعض المناطق في المخ.

طب ايه علاجه؟!

• العلاج الدوائي زي مضادات الاكتئاب لأنها يتحتوي على السيروتنين اللي بيقلل استهلاك الأفكار دي فبتقل معاها الأعراض.
• جلسات العلاج النفسى واللي بتتحد في العلاج المعرفي السلوكي.
• العلاج بالتعرض أو ما يسمى ب”القصد العكسي” زي ما قال الدكتور فرانكل
  وهي إنك بتعرض على دماغك الأفكار دي وتفكر فيها بمزاجك بغرض الاستهزاء لحد ما تتلاشي أو إنك تتجاهل الأفكار دي ويبقي عندك لامبالاة اتجاهها.
• الإثارة الكهربية لبعض البؤر في الدماغ اللي بتقوم بتنشيط الأفكار دي.

الفرق ما بين مريض الوسواس القهري والشخصية الوسواسية القهرية؟!

طب آخر حاجة ايه الفرق ما بين مريض الوسواس القهري والشخصية الوسواسية القهرية؟!
الوسواس القهري ممكن ييجي لأي حد وفي أي سن وبيكون تعبان من وجود الأفكار دي وبيحاول يحاربها.
لكن الشخصية الوسواسية بتبدأ تظهر بعد ما تتكون شخصية الفرد ونسبة وجودهم ما بين 2 ل 8 %,
ومش بتضايقه وبيميل دائما للمثالية وإن أي حاجة يعملها ميبقاش فيها ولا غلطة
دايمًا عايزين يسيطروا على اللي حواليهم يعني يفكروا بطريقة معينه يلبسوا بطريقة معينة.

عشان كده مش بيكون عندهم مرونة في التفكير ومعظم الوقت راكنين مشاعرهم على جنب وده طبعًا بيأثر على علاقتهم باللي حواليهم.
يعني لو حد مقدم يسلم عليه ميرضاش يسلم عليه ويحرجه ويقوله أصل إيدك مش نضيفة مثلاً.
مع أن معظم الشخصيات الوسواسية من الأشخاص الناجحين جدا فابسط يا عم لو انت شخصية وسواسية.

أخيرًا الوسواس القهري مرض ولازم يتعالج وصاحبه لا مجنون ولا ملبوس وزيه زي أي مرض عضوي.
فمتجيش تقول لمريض الوسواس القهري معلش وبطل تفكر وخلي عندك إرادة قوية وعزيمة من حديد وكل الكلام ده.
لأن ده غصب عنه ولو كان يقدر يوقف أفكاره كان عمل كده من بدري ومش هيستنى كلامك فـ رفقًا يعني.
هنا نكون فد تعرفنا علي ما هو الوسواس القهرى وعلاجه.

قولولي طلعتوا بتعانوا من الوسواس القهري أو تعرفوا حد بيعاني منه وشخصيتكم وسواسية ومن الناجحين المكسرين الدنيا ولا لأ؟!

كتبه| مي علام

المصدر

اقرأ ايضاً:

ما هو الجهاز المناعي و طرق تقوية جهاز المناعة