الجامعة: هل أنت مستعد للحياة الجامعية؟
بفضل الله هنبدأ موسم دراسي جديد، وطلاب مستجدين في جميع الجامعات لكن في الوقت ده بيكون في أسئلة كتير في ذهن كل طالب ان الحياة الجامعية هتبقى عاملة إزاي؟
هل هي فعلا أحسن وأمتع فترة في حياتي ولازم أقضيها؟
وإيه المشكلات اللي ممكن تقابلني؟
ماذا بعد الجامعة؟
ما تفكرش كتير هنحاول في المقال ده نعطيك فكرة ونصائح وكل ما يخص الحياة الجامعية.
فخليك مستعد.
الجزء الأول: التعريف بالحياة الجماعية وخطوات المذاكرة فيها:
أولا: إيه هي الحياة الجامعية بشكل عام؟
لازم تعرف إن حياة الجامعة تختلف جدًّا عن حياتك في فترة الثانوية؛ لأنها تعتبر مسؤلية جديدة والفترة دى بأختيارك قد تكون أحسن فترة وتأهلك لحاجة كويسة بعد الجامعة، أو تكون الكابوس بتاعك!
- بمعنى في الجامعة كل قرارتك والمشاكل اللي هتمر بيها هتحلها لوحدك من غير إعتماد على الوالدين.
- مش ملزوم تحضر المحاضرات.
- مفيش حد هيسألك انت ذاكرت ولا لأ ولا دكتور هيهتم أنت ملتزم ولا لأ بالعكس في الثانوية.
- مسئول عن نفسك، الصحيان، المذاكرة، ادارة مالك، اتخاذ القرار، تنظيف السكن، أوضتك، والأكل، وكل حاجة (دا لو هتبقى مغترب).
أول يوم في الجامعة، أو أول فترة في الجامعة عموما هتحس إن الدنيا ملغبطة معاك، والدكاترة والمحاضرات والكتب كل دة وانت حاسس بتوهان وممكن تكون المواد باللغة الإنجليزية كمان.
ثانيا: إزاي أبدأ صح في الحياة الجامعية؟
اعتبر أول يوم دة رحلة الاستكشاف بتاعتك خد حد من زمايلك واستكشفوا الجامعة، مكتب الشئون، القاعات، والمكتبة، والمدرج بتاعك مكانه فين وهكذا.
هتدخل تحضر المحاضرات بتاعتك في أول أسبوع، اعرف إيه المواد اللي عليك والدكاترة، وطبيعة كل دكتور ونمطه في الامتحان لان الدكتور هو اللي بيتحكم في وضع الإمتحان والكتاب وهل ممكن ألجأ لمرجع تاني من غير ما يأثر على شكل الأسئلة اللي بتيجي في الامتحان.
سيبك بقى من كل الكلام التقليدي دة وقبل أي حاجة لازم تراعي كذا حاجة في دماغك:
1- إنت جي هنا تتعلم، إنت سايب بلدك وأهلك وجي علشان العلم فاخلص النية لله سبحانه وتعالى لان نيتك الخالصة لله هتساعدك كتير وهتخفف عنك، واعلم من “التمس طريقا فيه علما سهل الله له طريقا للجنة”.
2- أهدافك: شوف إنت عاوز تخرج من الجامعة وتبقى إيه هتقولي مش حابب الكلية، دي قصة تانية إنت دخلتها على حسب تنسيق الثانوية بس هل كدا إنت فاشل؟ جربتها؟
مش يمكن دي تكون سبب في وصولك لحاجة كبيرة قبل ما تحكم لازم تفكر كويس ومفيش حاجة اسمها كلية سهلة وكلية صعبة في حاجة اسمها طالب مجتهد وطالب كسول.نرجع بقى الأهداف دي هي البوصلة بتاعك اللي هتوجهك ولما تقع وتفتكر أهدافك هترجع تقوم مرة تانية فحدد أهدافك من دلوقتي علشان تقدر تقسمها لخطوات صغيرة علشان توصل ليها.
3- علاقاتك بربنا مهمة جدا: دي هتكون طوق النجاة ليك من أي مشكلة إياك وتضيع الصلاة أو تأخيرها.
4- الدراسة في البداية هتبقى صعبة لكن هتنحل:
عارف إي أكتر مشكلة لو حلتها هتبقا برنس زمانك؟
إدارة وتنظيم وقتك.
يومك دة ملكك فمضيعش وقت على حاجات فاضية.
التزم بحضور المحاضرات بتاعك.
ثالثا: ازاى تذاكر صح فى الجامعة:
- ابدأ اعمل لنفسك خطة: خطة يومية أو أسبوعية بالمواد اللي عليك وشوف المادة دي هتحتاج منك وقت قد إيه علشان تذاكرها، ما تستعجلش وخليك صبور ولو هتاخد منك 3 ساعات
ولو باللغة الإنجليزية خلي جمبك قاموس وكشكول امسك الصفحة وطلع كلمات الغريبة اللي فيها وسجلها واحفظها وتبقى ترجع ليها تاني.
- عاوز أنبهك كمان على حاجة، الوقت اللي هتتعبه دلوقتي في الترجمة هيقل مع الوقت؛ لإنه بعد كدا نفس كلمات هتكرر تاني فمش هتحتاج تترجمها تاني.أنا أول مرة فتحت الكتاب معرفتش فيه ولا كلمة وترجمت الصفحة كلها مع الوقت مبقتش أحتاج للترجمة.
- المراجعة: خلي كل نهاية أسبوع مراجعة علي اللي أخدته في كل مادة.
بلاش الطريقة التقليدية في المذاكرة لما تذاكر ناقش نفسك وابدأ حط أسئلة لنفسك طيب هي الجزئية دي ممكن تطبق عملي؟
طيب أسبابها إيه؟ وإيه اللي أثَّر عليها وهكذا؟
- الألوان: كويسة خلي الكلمة المفتاحية الأساسية باللون لما تشوفها تفتكر الفقرة كاملة.
- الشرح للغير:90% من المعلومة علشان تثبت علمها اشرحها لغيرك ممكن تتخيل فيه مجموعة طلبة وتشرحلهم، لزميلك لو مش فاهم أو أي حد.
- المعلومات: حط في بالك إنك تطلع بمعلومات مش مجرد تحفظهم وتحطهم في ورقة الامتحان ولو تعرف تطبق اللي بتدرسه عملي ادرسه.
- التسويف: إياك إياك والتسويف راجع وذاكر أول بأول.
لو التزمت بكل دة إن شاء الله هتلاقي الأمور بسيطة معاك وهتجيب تقدير كويس وهتطلع بمعلومات جيدة هتفضل معاك طول العمر.
الجزء الثاني والأهم فى الحياة الجامعية:
اولا: فترة الجامعة مش للدراسة الأكاديمية بس، لازم تتعلم مهارات تانية وتطور من نفسك بمعنى :-
- ابني ليك عادات تفضل معاك طول عمرك زي مثلا القراءة، تخيل تقرأ صفحتين كل يوم بعد شهر شوف هتخلص كام كتاب القراءة هتكبر عقلك وهتكسبك معلومات وهتوسع رؤيتك لحاجات كتير جدا القراءة القراءة.
- لو تحفظ كل يوم صفحة من القرآن او 5 كلمات إنجلش
أقرأ ايضا أفضل طريقة لحفظ القرآن من هنا :
- خصص لنفسك ساعة ويا سلام لو بعد الفجر قسمهم:
10 د ( حفظ قرآن).
10 د ( قراءة ).
10د ( كلمات إنجلش).
10 د ( رياضة).
بعد فترة هتتفاجيء إنك قرأت كتب حصيلة الانجلش اتحسنت حفظت أجزاء من كتاب الله جسد رياضي.
ثانيا: ما تتخرجش من الجامعة إلا وإنت متعلم:
1- متقن إنجلش: خدلك جولة هنا فى مقالة: كورس تعلم اللغة الإنجليزية مجانا.
2- علوم الحاسب: من اكسيل أو وورد أو باوربوينت مهما كان تخصصك مفتاحك لحاجات كتير وهيوفي ليك فرص كتير
اقرا ايضا: كورس تعلم ال icdl من الصفر للاحتراف.
ثالثا: ماذا بعد التخرج:
- المجالات الجديدة: شوف مجال من المجالات الجديدة واتقن واحد فيهم وصدقني هتلاقي نفسك إنسان تاني خالص بعد كل دة
- الصحاب الصحاب: سمعت عن مقولة” الصاحب ساحب”.
اختار شخص يشجعك وسيبك من الشلة اللي مضيعة وقتها في الخروجات مش معنى كدا ما تخرجش لا اخرج وانبسط بس لما تكون عامل اللي عليك ومش كل يوم خروج على الفاضي خلي مثلا الخروج مكافأة ليك إنك خلصت مذاكرتك واللي عليك.
اقرا ايضا: سلسلة طور نفسك فى دقائق.
رابعا: السكن & المدينة الجامعية:
لكل واحد مميزات وعيوب؛
- السكن( تكلفة أعلى، لكن حرية أكبر، وراحة إلى حد ما، وفيك تختار الشخص اللي هتسكن معاه سواء تعرفه أو لا ويفضل يكون غريب علشان لو من بلدك أو تعرفه هيكون فيه خلافات ومشاكل على حاجات تافهة).
–حط حدود من الأول مع شريك سكنك زي ( مواعيد اطفاء النور باليل- زيارة الأصدقاء- الحرية استعمال الفون والتحدث بصوت عالي أثناء المذاكرة نسقوا مع بعض وخليك شخص محبوب ومتخسرش شريكك في الأوضة علشان حاجة تافهة أو العناد.
- المدينة الجامعية (تكلفة أقل، لا حرية، لا تملك خيار اختيار شريكك، العدد كبير في الأوضة).
خامسا: الفلوس:
-بلاش تسرف الفلوس على الفاضي أهلك بيتعبوا علشان يوفروا ليك أصرف على اللي محتاجه بس وسجل الفلوس بتتسرف فين ولإيه علشان تعرف أكبر عامل بيستهلك فلوسك.
-خلي في علمك توفيرك للفلوس هيزود ثقة أهلك فيك علشان لما تطلب منهم هيقولوا إنك مسؤول.
الخلاصة:
1- اخلص النية لله، وعلاقاتك بيه اوعى تضيعها.
2- حدد أهدافك واشتغل على تحقيقها وطور من نفسك.
3- نظم وقتك، احضر محاضراتك، ذاكر، واتعلم صح، راجع، طبق المعلومات اللي بتاخدها، وخليك صبور، وافتكر الأمانة اللي معاك.
4- هتلاقي في حاجة اسمها student Activities ، والأعمال التطوعية، شارك بس باللي هيفيدك وهيزود من خبراتك؛ لإنها مهمة في CV.
5- ما تبقاش زي الشمعة بتحرق نفسك!!
في الكورسات ودة ودة راعي وقتك، ودراستك من الأولويات.
4- حافظ على الساعة اللي بعد الفجر اللي اتكلمنا عنها فوق وافتكر “خير الأعمال أدومها وإن قل”.
5- طور نفسك اتعلم لغة وحاسب وشوف باقي مجالات وحدد مجال لاقيت نفسك فيه ودوس فيه بس برضه راعي وقتك لو نظمته كل دة هيتوازن معاك.
6- انبسط وعيش حياتك واخرج بس بعد أما تخلص واجباتك
ها لسه مش مستعد؟ الحياة الجامعية جميلة جدا جدا وأمتع لحظات حياتك، صحبة وذكريات وهتطور نفسك وهتبقى في مكان تاني بس استغلها صح.
كتبه: أحلام محمد.