5 اساليب فى إزاي تنجز المطلوب منك النهارده؟
كل يوم بتأجل الحاجات اللي المفروض تعملها؟ يوم؟ أسبوع؟ شهر؟ أكثر؟! في المقالة دي هنوضح 5 أساليب تعملها على مدار اليوم تساعدك فى إزاى تنجز المطلوب منك النهارده، وأي يوم تاني.
ال5 اساليب فى إزاي تنجز المطلوب منك النهارده؟
اولا : اعمل اللي عليك النهارده وبكرة بتاع ربنا.
وهو مبدأ سهل وبسيط تقدر تبدأ بيه من ال 5 اساليب و فعّال جدا، لو إنت ضيعت من وقتك ومن عمرك كثير، مش مشكلة،
اعمل اللي عليك النهارده، لو إنت كنت شخص كسول ومستهتر ومش عايز تعمل أي حاجة، عادي مش مشكلة، اعمل اللي عليك النهارده،
مش مطلوب منك تبقى سوبر مان ولا إنك تبقى ملياردير في يوم وليلة، كل اللي عليك تعمله إنك تستغل وتستفيد من “النهارده” بأفضل شكل ممكن.
إيه النتيجة بكرة؟ الله أعلم! هتبقى مليونير؟ بطل العالم في الشطرنج؟ أشهر كاتب ومؤلف؟ برده الله أعلم! ربنا هيسألك عن السعي والعمل، مش هيسألك عن النتيجة،
لإنه الشغل والسعي ده دورك، أما النتيجة فبتبقى فضل وحكمة من ربنا، فاعمل اللي عليك، وسيب الباقي على ربنا.
ثانيا : اصحى بدري قدر الإمكان.
هتعمل إيه لو إنت بكرة رايح مكان عارف إنه زحمة؟ هتروح بدري!
اعمل نفس الكلام في اليوم بتاعك، لو إنت على مدار اليوم عندك مهام/أنشطة/شغل كثير فالأفضل إنك تبدأ بدري، لو الناس بتصحى ما بين 6:00 لـ 7:00 حاول إنك تصحى بدري ساعتين، الساعتين دول “سحر”،
ولو إنت جربت تصحى بدري الساعة أو الساعتين دول وجربت تستفيد منهم فأنت أكيد عارف كمية الشغل أو المذاكرة أو الحاجات اللي ممكن تنجزها في الفترة دي.
تخيل نفسك في نص اليوم على الساعة 1:00 الظهر مثلا، إيه أحسن؟
تكون أنجزت الحاجات الصعبة في بداية اليوم وترجع بيتك تتفرج على الماتش أو الفيلم؟
ثالثا: اعمل الحاجة الصعبة في بداية اليوم.
ولا تسيب الحاجات الصعبة لنهاية اليوم بعد ما ترجع وتكون تعبان ومش قادر تخلصها وتضيع الماتش أو الفيلم؟ حتى لو اتفرجت على الماتش هتحس بتأنيب ضمير إنك وراك حاجة لسه مخلصتهاش.
أكيد إنت عارف إيه الأحسن طبعا، ده غير إنك لما تشتغل في بداية اليوم هتكون نشيط ومركز والضوضاء أقل بكثير وده هيساعدك تنجز أسرع.
أقرا ايضا: ما هى أهمية التخطيط وكيف يساعدنى على تحسين حياتى.
رابعا : استغل الوقت اللي بتكون نشيط فيه.
في ناس مهما تحاول تصحى بدري الصبح مش بتعرف، طب إيه العمل؟
حضرتك هتفضل مراقب نفسك -فعليا- على مدار اليوم من أول ما تصحى لحد ما تنام، وتشوف إيه أكثر وقت بتحس إن ذهنك نشيط وفايق وعندك نشاط تشتغل.
هل الفجر؟ الصبح؟ الظهر؟ قبل المغرب؟ بالليل؟ بعد منتصف الليل؟
هتراقب نفسك كذا يوم -بشرط يكون نومك واستيقاظك تقريبا في الوقت، بعد كده تحدد الوقت اللي إنت نشيط فيه، وتبدأ تعمل فيه الأنشطة اللي بتحتاج مجهود ذهني وتركيز منك.
يعني لو إنت بتكون نشيط بعد منتصف الليل، ذاكر أو اتعلم أو اعمل الحاجة اللي محتاجة تركيز منك، عشان تقدر تنجزها بشكل مظبوط.
خامسا: ساعد غيرك قدر المستطاع.
أساعد غيري؟ هو أنا عندي وقت أساعد نفسي أصلا؟
حضرتك كإنسان واعي وعاقل واجب عليك تساعد أي حد تقدر تساعده، ده من مهامك كبني آدم على كوكب الأرض، ده أحسن لك، وأحسن للي هتساعده، وهيخلي ربنا راضي عنك،
وأنا بوعدك إنك لو ساعدت الناس ونيتك لله، ربنا هيبعتلك الناس اللي تساعدك وقت الزنقة.
أنا عارف إن الوقت اللي هتساعد فيه الناس، ممكن تستغله إنك تشتغل أكثر أو تتعلم أكثر أو حتى ترفّه عن نفسك شوية، بس وعد -تاني- ساعد الناس وربنا هيبارك لك في وقتك أكثر.
دي 5 أساليب ونصائح هتفيدك فى إنك ازاى تنجز المطلوب منك انهادرة و أكثر في اليوم بتاعك، ممكن كلها تفيدك، وممكن حاجات تفيدك وحاجات لأ، المهم إنك تحاوًل “تنفذّ” و”تطبق” و”تشتغل”
أقرأ ايضا : عن كورس إدارة الوقت والأولويات
ولو شايف إن الكلام ممكن يفيد حد تقدر تعمل “شير” لل 5 اساليب دى لعل وعسى يقرأها حد كان محتاجهم، أتمنى لك يوم سعيد وملىء بالإنجاز والنشاط..
أقرا ايضا : ما هو ال MBTI و كيف يمكنك قراءة الناس ؟
#كريم_الدين
#إنجز_أكثر