كيفية تعلم الانجليزية من خلال مكتبة السفارة الامريكية
في المقالة دي هنتكلم عن ازاي تقدر تتعلم الانجليزي من خلال مكتبة السفارة الامريكية وازاي تاخد اكبر قدر من الاستفاده منها.
انت بتروح المكتبة في 5 شارع توفيق دياب، جاردن سيتي، القاهرة. اقرب محطة مترو هي السادات وتسال اى حد قوله عاوز اروح السفارأنزل وقول عايز اروح السفارة الأمريكية، هتمشي شوية صغيرين ما تخافش
هتدخل من ناحية الكورنيش
ازاي تستفيد/ي من مكتبة السفارة الامريكية ف مصر؟
- لو بتتعلم انجليزي وحابب تطبق عملي :
كل يوم أربع مكتبة السفارة الامريكية بتعمل محادثات مع ناس أمريكيين عن مواضيع مختلفة وأي حد يقدر يحضرها ببلاش بس بشرطين هنقولهم ف الآخر. - ف الأيام العادية تقدر تروح وتعمل محادثة برضو مع ناس مصريين بس هتلاقي فيهم ناس جامدين جدا.
- زهقت من الكنبة والبلكونة والسرير ولعب البلايستيشن وحابب تتفرج ع افلام اجنبي بترجمة انجليزي وسماعات عالية آخر حاجة وتليفزيون الفرق بينه وبين السينما ملم (اللي هو مللي ) ، هتروح تلاقي الناس هناك عندها افلام اجنبي طازة وشاشات عالية تنين وسماعات وكدزة، وللأسف كمان ببلاش .
- عمرك ما لعبت ع الاكس بوكس وطول عمرك تسمع عنه بس زي حالاتي، هتلاقيه هناك وببلاش برضو.
- عندك بحث وعايز نت سريع ما يفقعكش، الناس هناك جايبين وصلة نت سريعة تنين ( تقريباً شادين سلك من أمريكا) وشوية أجهزة apple على قدهم كدة، وعلى فكرة… ببلاش برضو .
- بما أن الناس هنا في تعداد المثقفين وممكن كتير يكون بيدور على كتب أدب انجليزي أو تاريخ أو اجتماع أو تنمية أو أي بتنجان، الليلة دي كلها هناك ببلاش، لا وايه كل الكتب اصلية.
- فاضي ومش وراك أي حاجة وعايز تلعب شوية انت واخوك أو انتي واختك ومش حابين الاكس بوكس هتلاقي هناك طن العاب ذكاء وحروف متقاطعة وشوية العاب معرفتش حتى اسمها، وكله بالانجليزي.
- عايز تسمع محادثات انجليزي بهاند فري وجهاز audiobook مليان محادثات مختلفة، هتلاقيه هناك.
- طيب ليك ف جو الايفينتس والمحاضرات والاجتماعات والبتنجانات، هتلاقيه هناك، محاضرات عن مختلف المواضيع من تعليم ف الخارج ومنح وووووو.
- ليك فى جو تجميع الـ Puzzles هناك بيكون كل يوم فى Puzzle واللى بيجمعها بياخد تيشرت من المكتبه
- وقات كتير بتلاقى ترابيزات محطوط عليها مجلات علمية ومكتوب على الترابيزة فيما معناه خد واحدة واتكل على الله
استفاد منها ازاي في تحضير ال توفل TOEFL
خد التقيلة :
تقدر تستعير كتاب التحضير للتوفل TOEFL
اللي هو مش عارف بكام ميت جنيه ومعاه الاسطوانة بتاعته كمان
بس بيشترطوا فى البند دا انك تكون من القاهره والجيزة او حلوان
أسئلة شائعة بعد البوست ده
>> هي المواعيد بتاعتها امتة؟
كل يوم من الأحد للخميس من 10 ص : 4 م
>> هو في شروط عشان أدخل؟؟!!
اه
– اول حاجة يكون معاك البطاقة الشخصية مش مكسورة أو منتهية أو يكون معاك باسبور.
– ميكونش معاك أي شيء اليكتروني غير الفون اللي هتسيبه هو والهاند فري ع البوابة برة قبل ما تدخل، غير كدة بقى سواء فلاشة، شاحن، لاب، اي بود، أي بتنجان بينور حتى لو قصافة ظوافر مش هتدخل بيها.
>> طب لو نسيت وجبت معايا فلاشة أو أي حاجة من الممنوع ده ؟!
أولا لو قلبت شامبانزي إفريقي خليك متأكد ان الأمن مش هيدخلك، بس هتلاقي قدام السفارة بتديله الحاجة وهياخد فلوس لحد ما تخرج، وخلي بالك الفلاشة ب 5 جنيه عشان هيقولك عشرة، قوله انا داخل المكتبة
>> ايه هي شروط المحادثة اللي انت قلت عليها فوق؟!
– شرطين، أولهم انك تكون عامل كارنيه عضوية في المكتبة بتاعة السفارة،،، ازاي،؟؟؟
عادي بتروح أي يوم قبل الساعة 12 وتقول للريسيبشن عايز اعمل كارنيه
هيقوم رازعك صورة زي بتوع البطاقة وتستلم الكارنيه ف نفس اليوم.
تاني شرط انك تكون حاجز المحادثة عن طريق الميل، ودي سهلة، انت اول ما تدخل قول للريسيبشن عايز اعرف شروط المحادثة هيديك ورقة فيها كل حاجة
ينفع استعير كتب أو أسطوانات افلام أو كتاب صوتى؟!
اينعم
بس لمدة أسبوع وممكن تجدد أسبوع كمان عن طريق الميل أو رقم الأرضي بتاع المكتبة هتلاقيه ف ورقة الارشادات هناك.
طب لو نفضت بعد المدة؟! اليوم الزيادة ب خمسة جنيه تقريباً والساعة بخمسة جنيه والحسابة بتحسب.
>> يعني اول ما اروح اعمل ايه بقى؟!
بص يا صديقي هتسال ع البوابة عايز أدخل المكتبة اللي
تمام ( IRC ( information resources center
وتعتبر انك داخل سفارة الحاج أو الحاجة عجبك فلم ناس مشغلاه وفي مكان جنبهم شدلك كرسي وسماعة من ع الترابيزة واتفرج، عايز تلعب أدخل العب، عايز كمبيوتر، الجهاز الفاضي اشتغل عليه
انطلق يعني فى حاجات معينة للى معاه كارنية فى المكتبة بتاعة السفارة وفى حاجات بالتسجيل
بس هما ماشيين بمبدأ اللى يجى الأول هو اللى بيلاقى مكان يعنى لو العدد كمل تقريبا مبيدخلوش حد تانى الورشة اللى بتبقى شغاله دى
وخليك في الامان واعمل الكارنيه “كل اللى محتاجه صورة البطاقه تاخدها معاك وانت رايح مش اكتر والكارنيه بيكون
لمدة سنتين وببلاش بردو
كتب بواسطة | هشام أحمد
اقرأ ايضاً:
قصة نجاح شركة رينج التابعه لجيمي سيمينوف
سيمون دولان :طُرِد من المدرسة فأصبح مليونيرا
تعلم اللغة ألاسبانية للمبتدئين مقدمة من قناة طليق 2020