ازاي بيتم توصيل الكهرباء للمنزل :مهم جداً تعرف لما تجهز شقتك

عمرك سألت ازاي بيتم توصيل الكهرباء للمنزل
من الحاجات المهمه اللي لازم نعرفها هيا الكهرباء بتجيلنا من السد العالي ازاي وإيه المسار اللي بتمشي فيه ؟

توصيل الكهرباء للمنزل

في البداية الكهرباء بتتولد من التوربينات الموجوده بالسد العالي، بعد كدا بناخدها في كابلات ضغط عالي، ثم إلى محطات رئيسية، ثم محطات فرعيه.
محطات فرعيه أصغربعد كدا محول، ثم إلي اللوحه الرئيسية بالمنشأه ( 3 فاز وواحد ارضي )، وبعدين الصاعد، ثم لوحة الدور.

في النهاية لوحة الشقه ودي اللوحه اللي هتلاقيها موجوده عندك في الشقه واللي انت بتتحكم فيها براحتك وبكدا توصيل الكهرباء للمنزل.

المراحل اللي بيمر بيها بند الكهرباء :

—————————————————-

مرحلة الفرش :

قبل ما نتكلم في بند الكهرباء، لازم تكون عارف إجابة الأسئلة دي؟

• مكان السرير هيكون فين, عشان الكهرباء تكون يمين وشماله، بحيث لو انت نايم وعايز تشحن موبايلك، أو هتنور أبجوره تكون الكهرباء جنبك.
• مكان الكنبه بحيث الكهرباء تكون جنب الكنبة، متجيش بعد ما تفرش تتفاجأ إن الكهرباء ورا الكنبة.
• التلفزيون هيكون فين ، وهتعمل تليفزيون في أوضه واحدة ولا أكتر من أوضة ؟
• التكييفات اللى هتجيبها كام حصان ؟
• هتعمل أباليك ولا لأ ؟ ولو هتعمل هتحطها فين؟؟
• هتعمل جيبسو بورد ولا لأ, عشان ترميله خرطوم فوق الاسبوتات في عملية التأسيس، منعا للتكسير بعد كدا.
• مهم جدا تعرف أماكن كل حاجه في المطبخ، مكان البوتاجاز والثلاجه والميكرويف والشفاط .. وهكذا. ⬅ مرحلة

شراء الخامات:

الكهربائي هيجي ويعرف منك كل التفاصيل وتبدأ في مرحلة شراء الخامات اللي هيطلبها منك فركز معايا في اللي جاي دا:

1- لما تيجي تشتري الخامات متسترخصش في حاجتين ( لوحة المفاتيح – السلك ) عشان مش كل شويه تعملك قفلة، والماركات المشهوره للوحات المفاتيح “AVP” و “شنايدر”، وبالنسبه للسك “السويدي” والسويدي درجات وغالبا اللي في السوق كله مضروب، إلا السويدي اللي بيجي من المصنع وبعد كدا بيروح لموزعين معتمدين والموزعين المعتمدين دول بيضربوا السلك برضو – طيب ازاي تفرق بين السلك الاصلي والمضروب ؟

——————————————————————
مش هتعرف تفرق برضوا، ولكن الوحيد اللي يعرف يفرق هو الصنايعي الشاطر ، طيب هيفرق ازاي بقي ؟

• بيقشر السلك، السويدي هتلاقيه بيلمع زي الدهب كدا، أما السلك المضروب هتلاقيه مطفي وبهتان.
• بيمسك السلك وبيحاول يقطمه، أي سلك مضروب هيتقطم بسهوله.
• بيجيب ولاعه وبيحاول يولع في الجلد اللي حوالين السلك، السلك المضروب أول ما أولع فيه هتلاقيه بيسيح وينكمش بسرعه، أما السويدي هتلاقيه مقاوم جدا للحريق.
• إنك توزن لفة السلك في حالة إنك اشتريت حاجه قبل كدا وتاخد معاك الوزن دا ستاندرد.
• الموزع الوحيد اللي مبيضربش السلك هو “جبريل” هتلاقي المحل بتاعه في “العتبه” – “وسط البلد”.
• لازم تتأكد من الأسعار وانت بتشتري وتسأل في كذا مكان.

مرحلة التنفيذ:

• الكهرباء عبارة عن شبكة ومتوصلة باللوحة الرئيسية بتاعت الشقة والشبكة دي بتتكون من( علب وخراطيم بتوصل بينهم وسلك بيمشي جوه الخراطيم لحد اللوحه الرئيسية ).
• الكهربائي بيبدأ في التكسير عشان يثبت علب الكهرباء وبعد كدة بيمد الخراطيم ويبدأ يعمل شبكة بين العلب وبعضها ويشد سلك بينهم، ويجمع اللوحة ويركبلك مفاتيح اللوحة الرئيسية.
• -بتخليه يعملك كمان مخرج سلك في أي مكان محتاج سلك زي مراية الحمام وشفاط البوتجاز والأباليك ولو هتعمل إناره مخفيه.

المصنعيات:

1- الطريقة الأولي، إن الكهربائي هييجي يقولك أنا هاخد الشقه مقطوعية ب كذا، طبعا هتاخد منه الرقه اللي قاله وتسأل ناس عندها نفس مساحة شقتك وتسألهم المصنعية اتكلفت كام تقريبا، وفي الحالة دي هو مسؤول إنه يعملك أي طلب انت عايزه ف الكهرباء.

2- الطريقة التانية: باللقمة (البريزة تعتبر لقمة، المفتاح يعتبر لقمة) واللقمه من 30 ل 60 جنيه ف المتوسط، على حسب هيا قوي ولا بريزة عاديه ولا بريزة تكييف، البريزة العاديه أرخص ثم القوي ثم التكييف، ومخرج السبوت من 15-25 جنيه، مخرج السماعة بيكون أغلى من الاسبوت، وتركيب اللوحة بيكون من 500 ل 1000 على حسب مساحة اللوحة دي أسعار تقريبية وبتختلف من مكان لمكان ولازم يتعمل معاينه للمكان عشان يتحدد السعر بالظبط.

ملاحظات هامه من اجل توصيل الكهرباء للمنزل :

—————————

• المفروض الحيطه اللي راكب عليها لوحة المفاتيح تكون بسمك 25سم، لأن سمك اللوحه لواحدها حوالي 12 سم.
• لو عندي مفاتح وبريزه ( المفتاح يكون فوق والبريزه بتكون تحت) ولازم يكونوا فوق بعض تماما ومفيش حاجه منهم مترحله.
• مش هنشد السلك إلا في الأخر خالص عشان ميتسرقش وهنحط حبل جوه الخرطوم وهنسيب الحبل لحد التشطيب النهائي وبعد كدا أشد السلك بتاعي.
• أي مخرج بيكون مكون من علبه وشاسيه ( النحاس) ولُقم.
• سلك التكييفات يفضل يكون 6 مم حتي لو قدرته قليلة.
• سلك برايز القوي 4 مم او 6 مم .
• البرايز والمفاتيح 3 مم.
• السبوتات 1.5 او 2 مم.
• لو هتركب جاكوزي لازم تعرف الكهربائي عشان يعملك مخرج الكهربا بتاعه ومينساش فردة السلك الأرضي، وفايدة الفردة دي إن لو فيه كهرباء اتسربت للجاكوزي وشخص موجود فيه، الكهربا مش هتوصله، لأنه بيكون متوصل بسيخ حديد موجود ف مكان ما تحت ف التربة، فالكهرباء هتتسرب للحديد قبل جسم الانسان وكذلك في برايز الجهد العالي فاالمطبخ والحمامات.
• 1لو هتعمل بانوهات فيوتك في الحوائط لازم تقول للكهربائي عشان متلاقيش البانوه جاي ف علب الكهرباء.

توصيل الكهرباء للمنزل: استلام بند الكهرباء :

———————————-

• لازم تتأكد ان العلب السفلية كلها على نفس المستوي ولو بالعين.
• لازم تتأكد إنه وزعلك الاضاءه زي مانت عايز.
• تتأكد إن العلب والخراطيم مش بارزة عن المحارة.
• علب المطبخ والحمامات متثبتهاش، ليه بقي ؟؟ عشان تعرف تحركها براحتك لو قابلت بلاطة ديكور و انت بتركبها.
• اتأكد من مناسيب علب الكهرباء:
  1. المفاتيح منسوبها 90 سم من الارضية
  2. البرايز السفلية 30 سم من الارضية
  3. الاباليك 180 سم من الارضية
  4. – برايز ومفاتيح المطابخ والحمامات 120 سم من الارضية.
• تتأكد من اماكن الدش والتليفونات والبرايز والمفاتيح زي ما قولتله بالظبط. الخلاصة : الكهربا لازم تتعمل صح وبخامات نضيفة ومتينه، ومتبخلش فيها عشان تحمي ولادك وأهلك من أي ضرر.
  كتب بواسطة | أحمد طه عطوه

اقرأ ايضاً:

ليه لازم نسعي إلي تطوير الذات والثقة بالنفس
ما هو ال MBTI ؟ و كيف يمكنك قراءة الناس ؟
أدوات تعلم اللغة الألمانية