انواع التسويق: الفرق بين التسويق الداخلي والخارجي
في المقالة دي هنتكلم عن انواع التسويق وخصوصاً الفرق بين التسويق الداخلي (inbound marketing) والخارجي (outbound marketing).
انواع التسويق: ايه الفرق بين التسويق الداخلي والخارجي؟
علشان نجاوب على السؤال ده خلونا نعرف حاجتين
أولاً المعنى:
محتاجين نترجم الكلمتين ترجمة حرفية علشان نفهم احنا بنتكلم في ايه
كلمة inbound تعني بالعربي كلمة (الوارد)
و كلمة outbound تعني بالعربي كلمة (الصادر)
خلي المعنى ده قدام عنيك و كمل
ثانياً التطبيق في انواع التسويق:
انواع التسويق: التسويق الداخلي (inbound marketing)
في مجال التسويق بنقول إنبوند على أي طريقة تسويقية تخلي العميل يوصل لحضرتك بمجهوده هو.. مش بس بمجهودك انت في التسويق
يعني لما يسأل أو يعمل سيرش عن حاجة محتاجها يلاقيك انت قدامه لذلك يطلق على النوع ده انه تواصل تسويقي مزدوج بين المُعلن و الجمهور
بالمناسبة ممكن العميل يعمل كده عن طريق وسيلة ديچيتال أو غير ديچيتال
لو ديچيتال:
يبقى بيعمل سيرش على جوجل أو داخل فيسبوك أو أي منصة تانية، و نتيجة البحث بتوصله ليك و يبدأ يتصل بيك أو يزورك.
لو غير ديچيتال:
يبقى بيسأل حد، و الحد ده بينصحه بيك فبيجيلك أو يتصل بيك، أو ممكن يكون بيعمل لفة داخل سوق معين في منطقة معينة و بيدور على حاجة محتاجها و الناس توصله ليك فيجيلك أو يتصل بيك.
كده حضرتك تبقى عملت إنبوند ماركتينج لنفسك من خلال رأي العملاء أو من خلال تواجدك في محيط سوق معين أو من خلال مجهودك في تحسين نتائج البحث على المنصات الديچيتال
انواع التسويق: التسويق الخارجي (outbound marketing)
طيب الأوتباوند بيحصل ازاي
الأوتباوند ببساطة هو نمط تسويقي قائم على أساس إذاعة و إشاعة و ترويج معلومات و رسائل تسويقية يصعب تتبعها أو الرجوع إليها وقت الحاجة لأنها بتكون تواصل في اتجاه واحد فقط من المُعلن في اتجاه الجمهور
و ده زي مثلاً إعلانات الراديو و التليفزيون
و هنا بقول يصعب تتبعها مش يستحيل
لأن حضرتك وقتها بتشوف أو تسمع الإعلان و لو مش حافظ اسم المُعلن أو تليفونه مش هاتعرف ترجعله تاني
ملحوظة مهمة
حتى الـ outbound ماركتينج بدأ يتحول غصب عنه لشكل من أشكال الإنباوند لأن مفيش إسم أو براند النهاردة مالوش وجود على السوشيال ميديا لذلك أصبح سهل الوصول إليه بالبحث عنه
و هي دي نقطة الخلاف بين المسوقين على الفرق بين الطريقتين
معظم الناس بتتلخبط في الفرق بين الطريقتين لأن الفرق بينهم بدأ يختفي مع ظهور السوشيال ميديا و انتشارها و اصبح إعلان التليفزيون بيعرض هاشتاج و اسم صفحة فيسبوك و اكونت انستاجرام
(حرفياً بيتحول)
الفرق في الاتنين من حيث:
التكلفة
تكلفة التسويق الخارجي دايماً بتكون اكتر من التسويق الداخلي, لان التسويق الخارجي زي ما قولنا بيكون اعلانات في التلفزيون او الراديو او نلوح اعلانية فبتكون مكلفة جداً.
لكن التسويق الداخلي غير مكلف لانه بيعتمد علي التقنيات و المهارات وحتي الاعلانات المدفعوة مش مكلفة بالمقارنة بالاعلانات التقليدية.
قابلية القياس
التسويق الخارجي صعب قياسة ودايماً بيعتمد علي اللي شافوا وسيلة البث واللي اشتروا المنتج و الfeedback اللي علي المنتج.
لكن التسويق الداخلي ممكن قياسة من الاعلان او بعد شراء المنتج من خلال الاعجابات و التعليقات.
و قبل ما نقفل البوست عايز أصحح مفهوم خاطئ و
هو إن الإنباوند بدأ مع بداية الديچيتال ماركتينج
الكلام ده مش حقيقي
إنما نقدر نقول انتشار الديچيتال ماركتينج هو اللي وضح الفكرة و عمل منها بطل.
كتب بواسطة : محمد عزيز
اقرأ ايضاً:
تعلم اللغة الانجليزية من الصفر: ليه مش بعرف اتكلم انجلش ؟
نصائح لحياة افضل: 20 نصيحة لازم تعرفهم
تعلم اللغة الألمانية للمبتدئين من الصفر الى الاحتراف مقدمة من قناة طليق 2020