اوهام بنواجهها في تعلم الانجليزيه او اي لغة

اللغات من اجمل الحاجات اللي ممكن تتعلمها ف حياتك…..بس للأسف معظمنا بيلاقي صعوبات ف تعلم أي لغة وخصوصا تعلم الانجليزيه هنا ف مصر ” عُقدة الإنجليزي”

طبعا فيه ناس هتقول عشان اتعلمناه غلط واللي بيقول عشان النطق وووو……بس تعالوا نتكلم النهاردة بنظرة مختلفة شوية ف الموضوع ده
============================

نصائح من اجل تعلم الانجليزيه

مبدأياً خلينا متفقين ان مينفعش نبقي داخلين علي 2020 ولسة مابنتكلمش أي لغة تانية ف الوجود ، حاجة زي الانترنت والانفتاح العالمي اللي بقينا فيه اللي سهِّل عملية التعلم بشكل كبير ولكن معظم المحتوي اللي هيقابلك هيكون بالإنجليزي ف بالتالي لازم تتعلم اللغة دي باسرع وقت ممكن عشان تواكب كل جديد بينزل (العلم مابيقفش…..كل يوم فيه جديد)

اوهام ممكن نواجهها في رحلة التعلم

طيب ايه هي بعض الاوهام اللي بتبقي عندنا لما بنبدأ نتعلم أي لغة وخصوصا تاني الإنجليزي

1. اعتقادك أصلا انك مش هتعرف تتعلم انجليزي:

واحدة من أسوأ العوامل اللي ممكن تضيع منك أي فرصة للتطوير هو “الاعتقاد الذاتي الداخلي” انك مش هتحقق الهدف ده وده للأسف اللي بيلعب علي عقلك اللاواعي اللي مسؤول بشكل أساسي عن تعلم أي لغة عشان ده المحرك الأساسي انك تتكلم بسرعة ومن غير م توقف….ف لازم تحارب ده وتقنع نفسك الأول انك هتصارع الإحساس ده وهتتغلب عليه عشان توصل لمستوي كويس جداً ف اللغة.

2. (د انا بس لو أسافر أمريكا واعيش هناك كان زماني بقيت “لبلب” ف الإنجليزي ده)

معظم الناس بتفكر ف الجملة دي …..وده اعتقاد خاطئ برضه…..تعالي ناخد قصة حقيقية ف الموضوع ده…..واحدة اسمها (Penny) اتجوزت واحد انجليزي وعاشت ف إنجلترا 11 سنة وللأسف برضه ماتعلمتش انجليزي بالشكل اللي كانت متخيلاه اها هي قالت انها كانت بتفهم عيلتها بشكل شبه كويس بس لما كانت بتروح شغلها كان زمايلها بيطلبوا منها تعيد الكلام اللي بتقوله كتير عشان يقدروا يفهموها عشان نطقها مكنش سليم وفيه بعض الأخطاء الكتير ف بسبب ده كانت بتحس بالحرج م الكلام معاهم واخدت جنب وبطلت كلام
والنصيحة هنا **ان اللغة لازملها دراسة ومذاكرة ووعي كامل بيها مش بس أكون ف بلد بتتكلم انجليزي وخلاص**

3. لما بنيجي نتكلم مع اصحابنا بيقولوا دايما: انا نفسي ابقي (fluent ف الانجلش) عشان أتكلم كويس…..

طيب الأول تعالوا نعرف يعنى ايه Fluency اصلاً و هى ” اتقان الكلام في مواضيع معينة في اللغة” .. ودا ينطبق على اي لغة في العالم .. في العربي مثلا لو جيت كلمتني عن الطب هتلاقيني ميح ولا هنطق بكلمة .. انما لو جيت اتكلمت معايا عن الكورة او اللغات هتلاقيني دايس معاك .. نفس الكلام دا ينطبق على الانجلش….ف دورك هنا انك تتطور وتذاكر المواضيع الحياتية اللي بتستخدمها ف يومك بشكل مستمر وصدقني هتلاقي نفسك بقيت شبح ف الإنجليزي.

4. تعاملك مع تعلم الانجليزيه واللغة

بمعني اننا بنتعامل مع اللغة وخصوصاً هنا ف مصر علي انها “مادة وليست مهارة”
تلاقي الي عاوز يتعلم انجليزي معاه الكتاب ورايح جاي بيه و كل اللى فارق معاه انه ينجح ف المستوي اللي فيه حتي لو هو محققش المطلوب منه عشان ينجح فيه او انه بيروح أي مكان يسأل اذا كان فيه شهادة معتمدة او لا …..مع انك لو بصيت للموضوع بنظرة تانية هتلاقي ان اللي هيفرق معاك ف أي مكان هتشتغل فيه او هتسافر له انك تكون بتتكلم انجليزي كويس ، هو مش فارق معاه انت وقفت عند ليڤل كام او كنت بتاخد مع مين وفين….ف فكك بقي م الكلام ده وركز انك تتكلم اكتر ما تنجح فيها ك شهادة او مادة دراسية.

5. معنديش وقت

آخر وهم معانا النهاردة رغم انهم كتير وهنتكلم عنهم اكتر الا وهو جملة (انا معنديش وقت) اذاكر…..تعالي نحسبها مع بعضينا كدة:
دلوقتي يومك فيه 24 ساعة بتنام 10 ساعات (علي افتراض انك بتعشق حاجة اسمها نوم زيي وبتصحي تروح شغلك او جامعتك وبتشتغل او بتذاكر لمدة 8 ساعات….ياعم هنقول 10 زي اخواتهم يبقي الإجمالي لحد دلوقتي 20 ساعة……لسة عندك 4 ساعات ف يومك تقدر تتشقلب فيهم وتعمل فيهم اللي مابيتعملش مع ان كل المطلوب منك عشان تطور الانجليزي بتاعك 3 ساعات مذاكرة ف اليوم (شوف بقي بتضيع اد ايه كل يوم 
بس احنا بقي بنحب نضيعهم وخلاص مع انك لو اتعاملت مع اللغة (كمهارة) مش مادة دراسية هتلاقي نفسك بتمارسها وبتتكلم مع ناس وبتنزل تخبط هنا وتغلط وتتعلم هناك وهتلاقي نفسك اتطورت فيها جدا وانت مش واخد بالك.

ف النهاية احب أقول ان المذاكرة مش صعبة ولا الإنجليزي صعب (اللي ماتعرفوش انه بيُصنَف كأسهل لغة ف العالم والعربي اللي انت بتتكلمه اصعب لغة ف العالم ف شوف انت بقي) بس الموضوع كله ف تغير نظرتك للغة دي وازاي تذاكرها وتنميها زيها زي أي حاجة ف حياتك عشان هى دى مفتاح كل حاجة ف زمننا ده 

اقرأ ايضاً:

افضل نصائح عن كيفية تعلم الانجليزية
تلخيص كتاب قوة العادات “تشارلز دويج”
افضل 5 كورسات فوتوشوب للمبتدئين مجانا