نصائح لحياة افضل: 20 نصيحة لازم تعرفهم
![](https://freecoursesandbooks.net/wp-content/themes/publisher/images/default-thumb/full.png)
في المقالة دي هنقولكم نصائح لحياة افضل والنصائح دي لو عملتوا بيها فهي هتساعد في تغير حياتكوا بشكل كبير وهتخليكوا تتقدموا وتنجحوا.
نصائح لحياة افضل
1-هتعمل حاجة يبقى في حاجة فى حياتك هتتغير ، مش هتعمل حاجة هتفضل بطة بلدى زى ما انت حتى لو عندك 60 سنة .
2-لما تفتح الفيس بوك حدد ايه هدفك بالظبط منه ، متضيعش عمرك ووقتك على حاجات مش هتفيدك ” عمرك هيضيع”
3- مفيش حاجة اسمها منحة اللغة الانجليزية ومنحة كامبردج وفى نفس الوقت مفيش حاجة اسمها شهادة معتمدة فى الانجليزى الا التوفل والايلتس ودول مجرد امتحان عشان الشهادة يعنى
الغاية هيا الشهادة انما فى الشغل ” شهادتك هيا كلامك” ” متخليش حد ينصب عليك “
4-هتلاقى الناس اللى حواليك بتقولك ” انا نفسى اتغير” ” انا بجد زهقت من حياتى” “انا بجد نفسى ابقى ناجح”
الغريبة بقى ان هما مش بيعملوا اى حاجة عشان يتغيروا وبيفضلو مستمرين فى حياة البؤس اللى هما فيه
” ودى حاجة انا مش قادر افهمها”
5-مفيش بنى ادم طبيعى وعندو سلام داخلى ومتصالح مع نفسة هينتقدك نقد هدام “متهدوش اهتمام”
6- عارف انت الراجل اللى فى عيلتك اللى بيقولك ياخلبوص انت خلص جامعتك وشغلك عندى
“لما تخلص جامعة ابقى قولى عمل معاك ايه “
7- متتوقعش حاجة من حد
8- أوعى تعتمد على حد انه هيغير حياتك، ويجيبلك وظيفة احلامك ،متغامرش بمستقبلك ” أنت املك الوحيد”
9- دايما افتكر لو عايز تنام هتنام ، لو عايز تذاكر هتذاكر، لو عايز تعمل حاجة هتعملها
لو عايز نخلق اعذار هتخلق اعذار ، ولو عايز تحقق نتائج هتحقق نتائج ” انت المتحكم”
10- للمرة المليون وفى البيزنس بالذات ” أوعى توعد موعد مش هتنفذوا ، متوعدش من البداية “
10 نصائح اخري
11- انك تفتح شغلك الخاص دى حاجة سهلة ، انما انك تفضل مخلية شغال ده الجزء الصعب
12- حاول توصل لمستوى كويس جدا فى الانجليزى قبل ما تتخرج من الجامعة “صدقنى هيسهل عليك كتير اوى “
13- اتعلم من الدرس او الموقف اللى بيحصل فى حياتك عشان صدقنى لو متعلمتش من الدرس ده، الدرس اللى بعده هيبقى أرخم واصعب بكتير.
14- مفيش تعريف محدد للنجاح ، هتلاقية مختلف من شخص لشخص
حاول انك تحط مفهومك الخاص وعيش حياتك من خلال المفهوم ده “سيبك من التعريف اللى المجتمع حطه “
15-اللى مش بيتقدم بيموت
16- الضعفاء هما اللى بيصدقدوا فى موضوع الحظ.
17- أوعى تزهق من حياتك طالما عندك الصحة والقوة اللى تخليك تعمل اى حاجة.
18- متنفذش أى حاجة الا لو كانت بالنسبة لك منطقية ومقتنع انها فعلا منطقية.
19- لما توصل لمرحلة انك مؤمن تماما ان مفيش حد ممكن يعلمك حاجة جديدة صدقنى انت كدة فى مرحلة الانهيار.
20- لو انت شاب جامعى فأنت كل اللى تملكه حاجتين “الوقت والحماس”، ارجوك استغل الحاجات دى وخاصة وقتك ، عشان لما تتخرج هتفقد عنصر” الوقت” وهتبقى شغال . وقت الجامعة هو الوقت اللى المفروض تعمل فيه كل حاجة ومش بتعمل فيه ولا حاجة ” أعمل حاجة مفيدة”
اقرأ ايضاً:
ازاي الشخص بياخد قرار الشراء: نموذج aida في التسويق
ما هي المغالطات المنطقية وانواعها
افضل 5 كورسات فوتوشوب للمبتدئين مجانا