ازاي الشخص بياخد قرار الشراء: نموذج aida في التسويق
فيه نموذج بسيط ولكنه مهم بيفرق معانا جدًا لو عايزين نأثر على أي حد في قرار الشراء للمنتجات بتاعتنا وهو نموذج aida
- A= Attention = انتباه
- I= Interest = اهتمام
- D= Desire = رغبة
- A= Action = فعل
نموذج aida في التسويق
الكلام ع إيه بقى؟، الكلام ع مراحل لازم يعدي بيها أي عميل وهو بياخد قرار الشراء.. خليني احكي حدوتة صغيرة تلخصلك الليلة دي..
نموذج aida:الانتباه او attention
كان فيه ولد إسمه حمادة عنده ١٣ سنة بيتفرج ع التليفزيون وهو بيقلب في يوم شد إنتباهه إعلان (Attention) عن بلايستيشن أخر إصدار
فا وهو بيقلب بسرعة وقف الريموت فجأة ع الإعلان ده أول لما سمع إنه البلايستيشن هو أحدث فيرجن!
اتفرج ع الإعلان لأخره وشاف مواصفات اللعبة واستنى يعرف بتتباع فين بس النور قطع فجأة – فقري حمادة ده- راح استني لما النور جيه،
Interest
وبعدين فتح اللاب يعمل سيرش عليه (Interest)
لحد ما عرف انه بيتباع في محل في مول العرب.
Desire
نام حلم باللعبة صحي من النوم قرر يجيبه وقرر انه هيبتدي يحوشله بقى (Desire)
حوش حوش حوش لحد ما طلعت روحه وفي الآخر راح خد فلوسه من الحاج عادي جدًا
Action
وفي يوم وبعد ما خلص مدرسة طلع جري ع مول العرب والفلوس في جيبه ودخل ع المحل لقى البلايستيشن أخر قطعة فيه ع الرف هووب انقض عليها زي الفريسة ومسكها (Action)
-خدتوا بالكوا من انقض دي؟ اكشن بقي وكدس
وراح دفع الفلوس وتحويشة العمر بتاعت الحاج طبعًا مش بتاعته وخرج من المحل منتصر
هنا إعلان البلايستيشن خلى حمادة يمر بإيه؟
١. أولا لفت انتباهه وخلاه بدل ما قعد يقلب في القنوات بملل لأ يـ ستوب فجأة ويركز.
٢. كلمة زي آخر إصدار خلته يبقى عنده اهتمام يعرف أكتر عن مواصفات اللعبة فا فضل صابر ع الإعلان لحد ما يخلص.
٣. من كتر اهتمامه باللعبة عمل سيرش عليها نام قام ع إنه خلاص عنده رغبة يشتريها وابتدى يحوش فلوس
٤. في اليوم المنشود جري ع المحل وبالفعل اشترى اللعبة
*الفكرة إن إنت كا منتج لو فضلت واقف كتير مع عميلك في مرحلة الإنتباه ومنطتش ع المرحلة اللي بعدها عميلك هيزهق وهيقلب القناة.
*ولو فشلت إنك توصل لمرحلة الأكشن مضطر تعيد حساباتك ودراستك للسوق ولعميلك من تاني.
*وبرضه لو نطيت مرحلة قبل مرحلة عميلك هيترب وهيحس بالتشتت.
خُد عميلك ع الرايق وإنت بتكتبله أي محتوى هدفه قرار للشراء متستعجلش عليه وفي نفس الوقت متحسسهوش بالملل واللي هو طب هااا وبعدين؟
يعني بل ريقه في أول مرحلة وخلي عينيه تزغلل والأدرينالين عنده يعلى.
التاجلاين بتاع إعلان الـ Menus الآخير بيقول
“إنت لسه دوقت حاجة؟”
وبعدين اطلعله في كل حتة فكره بيك.. ع التليفزيون وف الشارع، على billboard و في إعلان مدفوع بس متكرهوش ف عيشته يعني.
وبعدين اتقل عليه وهو لوحده هيجيلك مستوي.
طيب لو مجاليش مستوي، يبقى مش هو ده عميلك المحتمل ولا ده الإستهداف بتاعك يا حلو.. فهمت ي حمادة؟ لأ ده حمادة زمانه مغلوب ٩/٠ في PES
كتب بواسطة | أروى عصام
اقرأ ايضاً:
ازاي تعمل خطة تسويقية كاملة للسوشيال ميديا
ماركتينج من الاخر: تايهين ومش عارفين نتعلمه ازاي
افضل 5 كورسات فوتوشوب للمبتدئين مجانا