ماركتينج من الاخر: تايهين ومش عارفين نتعلمه ازاي
في المقالة دي هنتكلم عن مشكلة بتواجه ناس كتير وهي ازاي اتعلم ماركتينج, فهنقولكوا ماركتينج من الاخر
( أنا شغوف بالماركتنج وكل ما اجى أخد كورس أون لاين مثلا ألاقى مصطلح جديد.
أروح أدور عليه أكتشف حاجات جديدة وأتوه لدرجة اني بقيت متلخبط جدا ومش عارف مين رايح فين ومين بيودي على ايه ، أنا محتاج أعرف راسي من رجلي وأنا بتعلم وأتعلم ايه قبل ايه )
ماركتينج من الاخر
ايه هو الماركتينج
قبل ما نحل المشكلة دي مهم نعرف هو ايه الماركتنج أصلا ؟
باختصار شديد جدا ممكن نلخص الماركتنج في حاجتين :
1- انك تـ create الـ value بتاعتك وتوصلها للعميل المناسب
2- انك تـ manage الـ relations اللي بين الشركة وبين العملاء بتوعها
بشرط العلاقات دي تكون مربحة للشركة * لأن ده هدف الشركة من توظيفك أساسا *
بس الصياعة بقا ان العميل ميحسش بده وميحسش غير بانه بياخد value
أو عالاقل يحس انه كسبان من عملية التبادل اللي بتتم بينه وبين الشركة ( هو بياخد منتج و value وبيدفع فلوس )
نرجع لمشكلتنا الأساسية بقا
ماركتينج من الاخر: اقسام الماركتينج
خلينا نقول ان التسويق كله ع بعضه عبارة عن 4 عمليات بيدخل تحتهم كل حاجة ممكن نتخيلها بقا
هنحاول نتكلم عن كل عملية منهم باختصار :
1- أول عملية هي تحديد احتياجات السوق ( Market Research )
ودى أهم مرحلة فى التسويق، وهى سر النجاح أو الفشل لأى مشروع فى الدنيا، لأن ببساطة بدون ما الشركات تعرف هى رايحة على فين، وأنهى عميل اللى هتخدمه، يبقى هتتوه فى زحمة السوق ، وبالتالي فعلاً كل المراحل الباقية مش هتبقى مهمة أو مؤثرة بالشكل المطلوب.
حاول تتخيل شركة عندها كل الامكانيات اللى فى العالم، لكن مش عارفه إيه هو السوق اللى هتخدمه، ومين هما العملاء اللى محتاجين لنشاطها ..
الصورة واضحة
2- تاني حاجة هي الاستراتيجية التسويقية ( Marketing Strategy )
الشركة هتحدد ببساطة نوعية العملاء اللى هتخدمهم وإزاى هتقدر توصلهّم وتخدمهم بأحسن شكل ممكن، وفى حدود اإنمكانيات الموجودة.
فى الاستراتيجية التسويقية بتقسّم السوق لشرائح سوقية، وبتختار أنهى شريحة اللى تقدرتخدمها كويس فى حدود إمكانياتك، وبعدين بتبدأ تستهدف الشريحة اللى اخترتها، وتطور كل جهودك عشان تخدم الشريحة دى، وكمان هتحاول تكوّن صورة ذهنية معينة هتتحفر فى أذهان الشريحة دى عن منتجك أو خدمتك واللي بنقول عليه الـ Position
3- تالت حاجة هي الــ Marketing Programs
الأفكار والإبداع وكل حاجة من النوعية دي بتتم هنا .. التسعير وتطوير المنتج والدعايا بكل أشكالها ،، كل ده ممكن يدخل ضمن الخطوة دي ..
4 – رابع وآخر حاجة هي إدارة العلاقات المربحة اللي بين الشركة وبين الـ customers بتوعها ..
وهنا الشركة بتكوّن نظام كامل يخدم العميل فى كل نقطة بتتعامل معاه فيها، لدرجة إن قوة وجودة خدمة العميل بقت من ضمن المزايا التنافسية اللى بتميز الشركات عن بعضها دلوقتي ،،
اللي عملناه دلوقتي هو اننا أخدنا نظرة من فوق أوي على الـ Marketing بشكل عام ،، وبالمناسبة احنا كده حلينا المشكلة وانت مش واخد بالك
يعني أنا لما أقرأ بوست كويس عن التسعير وازااي التسعير ده لوحده علم مهم جدا وبيعملوا مش عارف ايه وبيدرسوا ايه .. هل ابقى متلخبط برضو ؟
لا أنا عارف ان ده من ضمن الـ marketing programs خلاص ..
لما أشوف يافطة متعلقة في الشارع لما اشوف بوست عالـ Facebook ده ايه ؟
لما أشوف form أو استبيان فانا خلاص عارف ان ده من ضمن الـ Market Research اللي بيتعمل عشان نعرف نحدد الوجهة بتاعتنا بالظبط ونعرف احنا ماشيين صح ولا غلط ..
كل حاجة جواها تفاصيل ومتشعبة لحاجات تانية ،، وللاسف ممكن تلاقي حد مقسم تقسيمة مختلفة عادي جدا .. عارف ليه ؟
أصل علم الماركتنج ده مكانش موجود وبعدين بدأنا نستخدمه مثلا .. لا ده فن أصلا كلنا بنستخدمه بالفطرة وخبراء التسويق بعد ما شافوا مواقف شركات كتيرة بدأوا يحطوا العلم ده في الكتب عشان يهندلوا الفن ده وينظموه
أتمنى تكون أول مشكلة اتحلت ولو بشكل مبدأي
كتب بواسطة | أحمد حمزة
اقرأ ايضاً: