أهم خطوات النجاح وكيفية السعي والوصول للنجاح
![](https://freecoursesandbooks.net/wp-content/themes/publisher/images/default-thumb/full.png)
في المقالة دي هنتكلم عن أهم خطوات النجاح ال مفروض نعملها عشان نوصل للنجاح. الخطوتين دول بيمثلوا مفاتيح النجاح لأي حد.
أهم خطوات النجاح
- المبادرة
- التأقلم
مش كل الناس عندها المهارتين دول، رغم انهم أهم خطوتين في النجاح!!
((المبادرة))
كنت قريت بوست زمان عن الصلاة واحد كان كاتب رأي مختلف ازاي تنتظم عالصلاة.
كان بيقول هتفضل تقرا في كتب وتسمع فيديوهات ازاي تنتظم عالصلاة وتعمل خطط وتسال وتدور ازاي تنتظم عالصلاة وفي الاخر مش هتصلي.
لان اول خطوة عشان تنتظم في الصلاة انك تقوم حالا تصلي!!
من غير اي تفكير في الاخر هتنتظم لو قررت كل ما تسمع الاذان تقوم تصلي في وقتها لان ده الحل الوحيد..
الرأي ده كان عظيم وفادني جدا وقتها، وفعلا انتظمت في الصلاة ..
وقيست ده على كل حاجة في حياتي..
اكتشفت ان اي حاجة انا عايزاها ومستنية حاجة تحصل عشان اخدها
هي في النهاية مش هتحصل
ليه؟ لانك مستني..
الانتظار بيقتل الشغف، ولما توصل بعد سنين انتظار في مكانك غير لما توصل بعد انتظار بحركة وافعال ومبادرة وفي وقت اقل!
عايز ترتب فولدرات اللاب ومستني يوم تكون رايق؟
مش هييجي اليوم قوم شغل اغاني يلا ورتبه حالا وهتتبسط لما كل يوم متدورش عالحاجة في الجهاز كله وتبقى عارف مكانها
عايز تبقى اكتر واحد خبرة في مجالك بعد سنة؟
يبقى لازم تبقى اكتر واحد بيتعلم في مجاله دلوقتي حالا اقرا واسمع واسال واشتغل بايدك وسنانك
الحاجة لما بتيجي انشالله بعد سنين بس سنين تعب مش زي لما تيجي بعد شهور انتظار واكتئاب.
ويا بخت من بدأ وغير اللي حواليه ولا قعد استنى وعيط الناس عليه
التأقلم
ناس كتير بتشوفه استسلام، خنوع، وناس كتير بترفضه عشان عايزة تغير الوضع اللي هي فيه ايا كان ايه هو.
بس الحقيقة التأقلم قوة.
انت لو قررت تتأقلم على وضع انت مش حابه يبقى انت هزمت وكسرت اول حتة في الوضع ده: رفضه!
مترفضش اي شئ بيحصلك، لإنه حصل بسبب ولسبب، الكون مش عبثي وربنا مبيلعبش معاك.
بس مش معنى انك تتأقلم مع ظروفك انك تستسلم لها، انت بس بتحايلها وتتلون بلونها عشان تعرف تغيرها لما تيجي الفرصة، العند مش حلو في كل حاجة اطلاقا!
الموت، الافلاس، المصايب..
هي حاجات صعب التأقلم عليها وربنا عارف ده كويس بس كل حاجة منهم هي سنة من سنن الحياة مينفعش متحصلش.
وده اللي بيخليك دايما في نزاع مع نفسك..
جزء منك رافض اللي حصل ومش موافق بيه وبيحاربه وفاكر انه كده هيغيره.
وجزء تاني عايز يبقى اقوى باللي حصل، يبقى اقوى بالتأقلم، ويخدع الظروف في اقرب فرصه للتغيير.
انت لو كسرت العند اللي جواك وتأقلمت مع أي حاجة وحشة بتحصل ونيتك هي تغييرها في اقرب فرصة، انت بكده هزمت المصيبة، ضيعت قوتها، وبقت مجرد فترة وهتعدي!!
…
يبقى المبادرة والتأقلم هما سلاحك، حتى في الكتابة على فكرة، عشان تكتب رواية لازم تبقى دلوقتي اول صفحة وعشان تبقى مشهور لازم تتقبل ان ممكن اول اعمالك متنجحش لكنك مش هتبطل تحاول.
السعي ثم السعي ثم السعي يا بشر، وفي يوم من الايام هتحصد نتيجة اي خطوة صغيرة قمت بيها وساعتها هتعرف قيمة العوض بجد
كتب بواسطة.سماح هشام
اقرأ ايضاً:
كيفية كتابة مقالات seo متوافقة مع محركات البحث