ملخص كتاب فن التعامل مع الناس للكاتب كارنيجي
![](https://freecoursesandbooks.net/wp-content/themes/publisher/images/default-thumb/full.png)
هنتكلم في المقالة دي عن ملخص كتاب جديد اسمه “فن التعامل مع الناس لديل كارنيجي“. وهو يعتبر من اكثر الكتب انتشاراً الايام دي.
كتاب فن التعامل مع الناس
الكاتب بيقولنا في مقدمة الكتاب إن التعامل مع الآخرين مش شيء سهل زي ما بعضنا بيتوقعه، بالعكس دة شيء صعب لأن طبائع الناس مختلفة.
وعشان نقدر نتأقلم عليها و نعرف نتعامل معاها من المفروض إننا يكون عندنا خبرات و مهارات كتير.
![](https://c.top4top.io/p_1626bxdvv1.png)
★ أول حاجة .. إيه هي الأسس و المبادئ الرئيسية في التعامل مع الناس ؟
فكّر شوية !!
★ أول نقطة أو مبدأ من المهم جدًا إنك تاخد بالك منه في معاملاتك مع الناس هو:
لا تتعجل في محاسبة الناس
طيب يعني إيه!!؟
يعني مينفعش إنك تطلق أحكام على الناس سريعًا سواء بالسلب أو الإيجاب لأن غالبًا حكمك هيكون خاطئ.
والأهم من كده إنك في أي موقف من المواقف متحكمش على حد طبقًا للمنطق لأن تصرفات الناس غالبًا لا تخضع للمنطق ولكن، العواطف.
وحاول قدر المستطاع تكون متفهم و متسامح و توجد أعذار للناس.
متنتقدش حد أو تلومه
من غير معرفة الأسباب الحقيقية لأن ده حُمق مش ذكاء.
★السر الأعظم في معاملة الناس من كتاب فن التعامل مع الناس
تعرف إيه هو السر اللي يخلي الشخص اللي قدامك يحترمك و يتقبل حديثك وكمان تخليه متقبل لرأيك؟
يعني من الآخر زي ما بنقول عندنا بالمصري كده «تكسبه».
عمّك ديل كارنيجي بيقول إن السر هو «الرغبة»
مش فاهم صح !!؟
هشرحلك اهو ..
معنى كلامه إنك تشوف الشيء اللي بيرغب فيه الطرف الآخر أو بيحتاجه؛ يعني اللي قدامك محتاج تقدير أو احترام خليه يحس بكده, محتاج عبارات شكر و ثناء قله عبارات شكر وثناء ..
اعرف طريق الشخص و الحاجة اللي هو محتاج ليها هتكسبه .. بس كده.
★«إن من يقدر على فعل ذلك يمتلك الدنيا .. و من لم يقدر يسير الطريق بمفرده».
غريبة الجملة دي لأ وعميقة كمان .. صح !!؟
الجملة الغريبة اللي مش مفهومة دي بدأ بيها الكاتب فصل من فصول الكتاب كنوع من إنه يحفز الشخص اللي بيقرأ يعني .. طب معناها إيه؟
بيقولك بقى:
إنك لو مقدرتش تخلق في الشخص اللي قدامك رغبة جامحة في الحديث يبقى أنت كده هتفضل طول عمرك عايش وحدك.
مش فاهم برضو صح !!؟
كلنا عندنا اهتمامات مختلفة وعشان تقدر تحبب الشخص اللي قدامك في الحديث لازم تتكلم عن اهتماماته؛ لأنك لو معملتش كده مش هيكون في عامل جذب للطرف التاني وبالتالي مش هيحب يتكلم معاك.
فبالتالي برضو أنت هتفضل طول عمرك لوحدك عشان مش عارف تكسب الأشخاص اللي قدامك و تزرع فيهم الرغبة في أنهم يحبوا حديثك .. بس كده.
★ افعل ذلك .. تكن موضع إعجاب الناس أينما ذهبت.
عشان تكون موضع إعجاب لازم تتخلص من الأنانية وتحاول تساعد الغير .. مساعدة الطرف الآخر من أقصر الطرق لأنك تكسبه.
و أسرع الطرق لتكوين علاقات جديدة ولكسب الأصدقاء هي إنك تظهر اهتمامك بالناس وحبك ليهم.
★ كيف تجعل الناس يحبونك في الحال!؟
عشان تخلي الناس تحبك فأنت المفروض تعمل اللي هما بيحبوه .. اللي هو إيه يعني !؟
خليهم يحسوا إنهم أشخاص مهمين وأظهر الاهتمام ده.
اقرأ ايضاً:
تلخص كتاب فن اللامبالاة للكاتب مارك مانسون
كتبه | أميرة حسين