الفرق بين الإنجليزي الأمريكي والبريطاني.. إيه الأفضل؟
لما بنيجي نتعلم لغة الإنجليزي بنلاقي نفسنا قدام حيرة شديدة، نتعلم أمريكي ولا بريطاني؟ إيه فيهم أسهل من الثاني؟ وإيه فيهم أهم؟ و يا ترى هل الفرق بينهم كبير لدرجة أنه ممكن يلخبطني وأنا بتعلم اللغة؟
الإنجليزي زيه زي أي لغة في العالم هتلاقي فيه لهجات بعدد الدول والمدن كمان اللي بتسخدمه؛ لكن أشهر لهجتين معتمدتين اللهجة البريطانية واللهجة الأمريكية. ولأنهم مجرد لهجتين للغة واحدة، فلازم نعرف إن البريطاني مش بيختلف كتير عن الأمريكي بالدرجة اللي ممكن تلخبطنا لكن بيكون فيه بعض الاختلافات البسيطة في طريقة النطق وقواعد اللغة.
اختلاف الكلمات المستخدمة
الإنجليزي هتلاقي فيه أكتر من كلمة بتدي نفس المعنى دون أي اختلاف؛ زي مثلا كلمة «Biscuits» اللي متاخدة منها كلمة «بسكويت» بالعربي، وكلمة «Cookies» يعني بسكويت برده.
طيب إيه الفرق بين الإنجليزي الأمريكي والبريطاني
الإجابة ببساطة أن كلمة «Biscuits» هي بريطاني وكلمة «Cookies» أمريكي.
مثال تاني لكلمة بنستخدمها كل يوم وهي «Movie» يعني فيلم سينمائي بالأمريكي، وكلمة «Film» يعني فيلم برده لكن fالبريطاني.
وزي كلمة «Candy» ومعناها حلوى أو «بونبوني» بالأمريكي، وكلمة «Sweets» بالبريطاني، ومعنها برده حلوى أو بونبوني.
| إنجليزي أمريكي | إنجليزي بريطاني | المعنى |
| Cookies | Biscuits | بسكويت |
| Candy | Sweets | حلوى/ بونبوني |
| Movie | Film | فيلم سينمائي |
فرق في كتابة بعض الكلمات
وبعض الكلمات القليلة في اللغة الانجليزية بتختلف كتابتها أو الـ «Spelling» بتاعها بين الانجليزي البريطاني والأمريكي.
| إنجليزي أمريكي | إنجليزي بريطاني | المعنى |
| Color | Colour | لون |
| Center | Centre | مركز |
| Gray | Grey | رمادي |
الفرق في النطق
وزي أي لهجة في أي لغة في العالم، الانجليزي البريطاني بيختلف عن الانجليزي الأمريكي في نطق بعض الكلمات والحروف. والفرق في النطق هو أكتر حاجة بتظهر لما تيجي تتكلم بالانجليزي مع الأجانب أو مع ناس بتعرف إنجليزي كويس.
وعشان تعرف الفرق في النطق بين بعض الكلمات ممكن تشوف الفيديو ده
فروق في الجرامر
قواعد الجرامر في اللغة الإنجليزية واحدة، لكن برده فيه فروق بسيطة بين بعض القواعد بين الإنجليزي البريطاني والأمريكي.
فمثلا في تصريف الفعل للماضي البسيط «Past Simple» الكلمات اللي آخرها حرف «L» بنضاعف الحرف في الإنجليزي البريطاني.
كلمة Travel»» في الماضي هتبقى Travelled» » بالبريطاني. وبالأمريكي هتبقى Traveled» . من غير ما نزود «L».
بالبريطاني هنقول I travelled to china. وبالأمريكي I traveled to china. يعني أنا سافرت الصين
مثال آخر
في الكلام عن المستقبل البريطانين بيحبوا يستخدموا «Shall» بدل «Will» فبيقولوا «I shall go home» يعني أنا هروح البيت وبالأمريكاني «I will Go Home».
طيب ليه لازم أعرف كل ده؟
لو ناوي تسافر بره أو تشتغل في شركة أجنبية جوه مصر، يبقى لازم تحدد من الأول هتختار إنجليزي بريطاني أو أمريكي من البداية.
لأنها بتفرق لما تتكلم نص كلامك أمريكي والنص التاني بريطاني. بيبقى باين أوي أنك مش متمكن من اللغة ومش فاهم الفروق بينهم حتى لو بسيطة؛ زي اللي بيتكلم نص كلامه مصري والنص التاني شامي
أختار الإنجليزي بريطاني ولا أمريكي؟
أنت اللي بتحدد بنفسك على حسب أنت عايز تعمل إيه بالإنجليزي اللي هتتعمله. لو عايز تتعلمه لنفسك أو عشان تشتغل في شركة مصرية بتتعامل بالإنجلش أو عشان تسافر وتلف العالم يبقى مش هتفرق هتختار إيه فيهم.
لكن لو أنت حابب تدرس في جامعة معينة بريطانية أو أمريكية أو تسافر بلد معينة يبقى لازم تكون مدرك للهجة اللي هيحتاجها المكان اللي عينك عليه كويس أوي.
مينفعش يبقى طموحك تدرس في أمريكا وتروح لهم بتتكلم بريطاني، أو العكس.
ولو هتسافر دولة غير أمريكا وغير إنجلترا أو بريطانيا، يبقى لازم تعرف اللهجة اللي بتستخدمها. دولة زي كندا أو أستراليا بتعتمد الإنجليزي البريطاني في الشهادات الدولية.
الشهادات المعتمدة
عشان تدرس أو تشتغل بره بيكون مطلوب منك شهادة معتمدة عالميا تقول أنك متقن للغة الإنجليزية.
بالنسبة لالأمريكي، فتحتاج لشهادة التويفل، اللي تقدر تحصل عليها من الجامعة الأمريكية بالقاهرة أو من معهد «أميديست» الأمريكي.
وبالنسبة لالبريطاني هتحتاج شهادة الآيلتس. وتقدر تدخل الاختبار بتاعها وتحصل عليها من الـ«بريتش كونسيل» أو المجلس الثقافي البريطاني.
أماكن تانية
لكن لو عايز تتعلم بس ومش مهتم بالشهادة في الفترة الحالية، فممكن تروح معهد «بيرلتز» المتخصص في الإنجليزي البريطاني.
وبالنسبة للإنجليزي الأمريكي فممكن تروح «S.Y.E.» أو «Spread Your English».
وأي مكان تاني هتروحه لازم تسألهم الأول إيه نوعية الإنجلش اللي هيدوه، أمريكان ولا بريتش؟
وبالنسبة للكورسات الأونلاين؟
ولو أنت من المهتمين بالكورسات الأونلاين، فموقع «Coursera» هتلاقي فيه أغلب كورسات اللغة أمريكان إنجلش لأنها مقدمة من جامعات أمريكية.
اقرا أيضا
افضل كورسات تعليم اللغة الإنجليزية من البداية الى القدرة على المحادثة
أفضل كورسات تعلم اللغة الانجليزية التي يمكنك الحصول عليها 2021